జానపద గేయాలు
తేది : 02-09-2023
శీర్షిక : మానవా ఏదిరా నీ జాడ
సహస్రాధికం.
మానవా ఏదిరా నీ జాడ
ఓ మనిషి ఏదిరా నీ నీడా …
ఆత్మీయత హరివిల్లంటివి
మానవత్వపు విరిజల్లంటివి…
అనురాగాల లోగిళ్ళంటివి
అనుబంధాల ప్రేమలంటివి…
పల్లెలే కద పట్టుగొమ్మలనె
దేశానికి ఆనాడు …
పరుగుబెట్టి నువ్వేమో
పట్నం జాడ బట్టితీవి
చదువు చారెడు బల్పాలు దోశెడు
చదువులెంబడి పడ్డ నీకు
అచ్చరాలు అంటపాయె
కానీ…
పట్నం సోకు కావాలాయె
మానవా ఏదిరా నీ జాడ
ఓ మనిషి ఏదిరా నీ నీడా …
పలువిద్యలెన్ని నేర్చినా
కులవిద్యకు సాటిరాదని
పాటి మాటగ నాడు నేర్పే
గువ్వల చెన్నయ్య దండిగాను..
చేతివృత్తులు మోటంటివి
కులవృత్తులు చేటంటివి
నడమంత్రపు సిరికాశించగ
ఉన్నది ఊడే ఉంచుకున్నది బాయె
మానవా ఏదిరా నీ జాడ
ఓ మనిషి ఏదిరా నీ నీడా …
2
అచ్చరాలంటినోనికేమో ..
పారిశ్రీమికీకతల పేరుతో
పరుగుపెట్టి నీరసిస్తుంటే…
వెనుదిరిగి చూసెవరకు
పావురాలే రాలిపోతున్నయి…
ప్రేమాప్యాయతలే కరువయ్యి
యతల కథలు గొల్లుమంటున్నయి..
రెంటికి చెడిన రేవడిలా
ఎందుకొచ్చిన తంటరా ఇది…
మానవా ఏదిరా నీ జాడ
ఓ మనిషి ఏదిరా నీ నీడా
సాంకేతికత వెంట నువ్వు
సంబరపడి పరుగుతీస్తే
పల్లె పట్నం దాటించింది
ఖండాంతరం ఊరించింది…
అమ్మనాన్నల బాగోగులు
ఆన్లైన్లో నర్సులకు సొంపితే ..
ఆస్తులన్ని కరగదీసినా
కన్నప్రేమల సాటి అగునా …
మానవా ఏదిరా నీ జాడ
ఓ మనిషి ఏదిరా నీ నీడా
చదువురాక కొంతమంది
చదువులతో మరికొందరు
పల్లె మరుగయి పట్నమొచ్చె
కళ్ళముందే కుప్ప కూలిన కలల సౌధం…
మంచిదాని మురిసెలోపల
కంచికథలను మార్చిరాసె
మనిషి జీవన విధానాలను
గ్లోబలైజేషన్ లిబరలైజేషన్…
మానవా ఏదిరా నీ జాడ
ఓ మనిషి ఏదిరా నీ నీడా
నగునూరి రాజన్న
No comments:
Post a Comment