చిత్ర కవిత (వరద నీటిలో బోర్లించిన పాత చెప్పుపై రెండు కోడి పిల్లలు) - 26-05-2023 శీర్షిక : చెట్టుకోటి పుట్టకోటి

 చిత్ర కవిత (వరద నీటిలో

బోర్లించిన పాత చెప్పుపై రెండు కోడి పిల్లలు) 

తేది: 26-05-2023

శీర్షిక : చెట్టుకోటి పుట్టకోటి 

చెట్టుకొకరు పుట్టకొకరు 

చెల్లాచెదురైన జీవితం 

ప్రకృతి విపత్తుకు 

పలాయనమై కాపాడుకున్న పాణం...  

తల్లి రెక్కల్లో పొదువుకోవాల్సిన 

చంటి పాపలు  దారి తప్పి

తల్లడిల్లే...పిల్ల ప్రాణాలు 

గజగజ వణుకుతూ  ఓ పక్కన .. 

బిక్కు బిక్కు చూపులతో 

భీకర సన్నివేశం ... కడుపు 

నింపుకునే సత్తా లేదు ... 

కాలు కదిపే పరిస్థితి లేదు .... 

కాల యవనికలో జరుగుతున్న  

కలి మాయల ప్రపంచంలో 

మనుషులకే దిక్కులేని 

మాయా ప్రపంచం..ఇక 

పశుపక్ష్యాదులకెక్కడ ? 

బుంగలో దొరికిన దుంగలా 

పాత చెప్పైనా ప్రాణాలకు 

ఊతమై నిలిచే ... పట్టుపరుపై 

తోచే ... పసి పిల్లలకు .... 

నగునూరి రాజన్న