లేనోడి పాలన కల*
Dt. 21-04-2021
యుగాలు మారినా జగాన తేజం
రామ రాజ్యమే ఘన ఉదహరణం
కాదెందుకో దృష్టాంతం కొందరికైనా
కాసుల మీదే యావా అందరికి ...
అత్యంత పెద్ద ప్రజాస్వామ్యం
అనేక రాజ్యాంగాల అవపోశనం
అంబేద్కరుగారే జ్ఞాపక చిహ్నం
రెక్కలు విచ్చుకున్న లిఖిత రాజ్యాంగం
(అసలు మరచిన ఆనవాళ్లే సుమా .... )
పేరుకు మనది ప్రజాస్వామ్యం
పెత్తందార్ల చేతిలో కీలు బొమ్మలం
పొడసూపుతున్న గోడల బీటలు
డెబ్బదేండ్లకే ఉలి దెబ్బల పగుళ్లు....
పకడ్బందీగా ఆర్టికల్స్ బిగించినా
పేదోడికి పాలన కుర్చీ ఓ కలేసుమా!
లేనోడికి పోటీలో నిలబడే వీలే లేదు
పెత్తనమంతా దళారీలదే ఎప్పడైనా...
అవాక్కయ్యే లక్షణాల ఆనవాళ్లు
అటెండెంటుకైనా అక్షరజ్ఞానమే
అందరిని పాలించే నాయకులకేమో
ఆర్హతల పట్టింపులు లేనే లేవాయే ...
వణికుల చేజారిన వాణిజ్యంలా
పలువురి ప్రవేశాలతో..పక్కదార్లు తొక్కి
నీతి నిజాయితీలకు తిలోదకాలిచ్చిన
ప్రజా జీవితాలకు ఆరోగ్యాలకు హామీ లేని రక్షణకవచంలా....
కుటుంబాల వంతున కుంభకోణాలై
పార్టీల వంతున పలారలౌతున్న
గనులు జలాలు..ప్రకృతి పంపకాలు
రాజకీయాలయి రాజ్యమేలుతున్నయి...
కౌన్సిలర్లకైనా కోట్లల్లో ఓట్ల ఖర్చులు
కాదా ఇక పక్కదారుల ఖజానాలు
జమా ఖర్చులకోసం (చె) అడ్డ దారులు
ప్రజాపాలనలన్ని పట్టు దప్పుతున్నవైనం....
అహం బ్రహ్మాస్మి... పరకాయ ప్రవేశం
లొసుగుల దండలో పూలన్నీ మాయం
అనుభవాల సారం మూటగడితే
అతి శక్తి వంతమే ప్రజాస్వామ్యం ...
అందుకు సాయంగా ....
ఊరికో మహాత్ముడు... ఉరికొయ్యను ముద్దాడిన
భగత్ సింగులు.. దేశమంటే దేహమన్న కలాంలు
మళ్ళీ పుట్టాలేమో...
మహిమాన్వితమైన మన రాజ్యాంగం
పవిత్రతను పదిలపరచి కాపాడేందుకు
(ఆ పరాశక్తి మహిమే .... )
రాజ్యాంగములో రాణులకు ఏబదంట
రాబందుల్లా అడ్డగింపులే వీరూ..వారూ
అధికార పక్షమని ప్రతిపక్షం వారిపాట
ప్రతిపక్షమేనని అధికార ప్రక్షం వారి మాట
సాగతీతల సణుగుల్లే కానీ సరికిరారు ....
అవగాహన ఉన్నోడు ఆయుధమవ్వాలి
అభివృద్ధికి బహు చక్కని బాటలు వేయాలి
అక్కున చేర్చుకోవాలి జన సామాన్యులను
ఆదర్శమై నిలవాలి అనంత విశ్వానికి.......
