Wednesday, June 3, 2020

నిప్పుల కొలిమెక్కిన దేవ దూతలు (కరోనా కవిత ) 12

నగునూరి రాజన్న
కరీంనగర్

శీర్షిక: నిప్పుల కొలిమెక్కిన దేవ దూతలు

కంటికి కానరాని కరోనా క్షిపణి కన్నా   
వేగంగా చిత్తు చిత్తుగా విస్తరించి 
చిందర వందర చేస్తుంటే....! 

గడప దాటి రాకంటు పబ్బతి 
పట్టిన పాలకులు... పాణాలను 
ఫణంగా పెట్టి పరుగు తీస్తున్న అధికారులు! 

అమ్మలా బుజ్జగిస్తూ నాన్నలా  
మందలిస్తూ అడుగడుగున 
అడ్డుపడుతూ కంటికి రెప్పలైన ఖాకీ వనాలు! 

మానవత్వాన్ని నెత్తికెత్తుకుని 
మనల్నికాపాడే పనిలో 
పడ్డ ధన్వంతరి వారసులైన 
ధవళకాంతి దేవదూతలు. 

ఆదమరువక సేవలందిస్తూ 
అందరి మన్ననలు పొందె ఈనాడు!
అవని శుభ్రత దూతలు. 

అహోరాత్రులు శ్రమిస్తూ అవని అంచుల 
సంచరిస్తూ ఆరా దీసి కలబోతలను 
అక్షరీకరించె పాత్రికేయులు! 

నీకొరకు నాకొరకు నిప్పుల కొలిమెక్కినారు
నిజమైన దేవుండ్లు నమ్ము సోదరా!

కనపడని క్రిమికోసం కత్తిమీద సాములా 
కవాతు చేస్తున్నారు కదిలిరా సోదరా!

పుట్టిన ప్రతివారికి మరణం తథ్యమైనా....
 అనాథ మరణాలను అడ్డుకుందాం సోదరా!

స్వీయ నియంత్రణలు పాటిద్దాం 
సురక్షిత జీవనం గడుపుదాం 
సదా పొరుగు క్షేమం కోరుదాం! 

నగునూరి రాజన్న 
కరీంనగరు.

ప్రపంచం మెచ్చిన భారతీయం

నగునూరి రాజన్న 
ప్రపంచం మెచ్చిన భారతీయం
తేది: 04-05-2020
శీర్షిక: ఆత్మ సాక్షిగా ఇది నిజం... 
సంఖ్య: 409

భారతీయతంటే ఏమని చెప్పేది  ?
పరాయిల పాలనలలో పాశ్చాత్యపు మోజులో  
పది తరాలు దూరమైన వేదాలు, 
ఉపనిషత్తులు, పురాణాలు, ఇతిహాసాలు, 
భగవద్గీత,రామాయణములని చెప్పనా....!

భారతీయతంటే ఎవరిని చూపించేది ? 
పదే పదే పదిహేడు సార్లు క్షమించి 
ప్రాణం తీసుకున్న నాటి రాజునా....!
ఒక చెంపమీద కొడితే రెండో  చెంప
చూపమన్న స్వాతంత్ర్య సమరయోధున్నా...! 

భారతీయమంటే ఎలా చెప్పను ? 
ప్రత్యేక బోధనలు ఉన్నా లేకున్నా  ప్రతివారిని 
ఆదరిస్తూ చేసే గొప్ప నిత్య జీవన విధానం 
మాత్రమేనని చెప్పనా.......!. 

భారతీయమంటే ఏమని చూపను? 
అరకొర కుక్కమూతి పిందెలు అరిచినా, 
బంగారమోలే కలిసికట్టుగా బతుకుతున్న 
హిందూ, ముస్లిం,సిఖ్, పార్సీ, బౌద్ధ, 
జైన మతస్థులనని చూపనా.....! 

పరుల మేలోర్వని పచ్చి నెత్తురు మరిగిన
పంతపు తీవ్రవాదులు ప్రశ్నిచడం తప్ప ....
మన:సాక్షిగా మననెరిగిన తక్కిన విశ్వమంతా 
మనసునిండా మల్లెల నీరాజనాలే.....! 
ఆత్మ సాక్షికి అంతకన్నా ఇంకేం కావాలి? 


నగునూరి రాజన్న 
కరీంనగర్

కరోనా కళ్ళల్లో కారం కొట్టా.....


కరోనా కళ్ళల్లో కారం కొట్టాలనకున్నా
కాలాన్నంతా కింది మీద జేసిందని..కాని 
కాలుష్యాలను కడతేర్చి మనకు 
మంచి చేసిందనిపిస్తున్నది...!

పర్యావరణం ప్రశాంతమై 
స్వచ్ఛమైన వేళ...సంబరాలు 
తీర్చుకుందామంటే ముక్కుకు 
మూతికి ముసుగు వేసుకోమంటుంది ! 

రహదారులన్నీ రాచమార్గల్లా 
రద్దీలేకుండా ముద్దొస్తుంటే 
బుధ్దిదీర వాహనమెక్కి పరుగులు
పెట్టిద్దామంటే పరిమితులు కుదరవాయె!

కలుషితం లేని హస్తమైనా సరే 
కల్సుకోక చాన్నాళ్ళైందని... 
కలుసుకున్న ఆత్మీయ నేస్తానికి సైతం
కరచాలనం అందించలేని దుస్థితి!

కావాల్సినంత సమయం
కలుసుకోవడానికున్నా ..... మిత్రుల్ని
కలుసుకోలేని కఠిన కాలాలను 
కంట చూడాల్సివస్తోంది! 

వండి వార్చాలనే కోరిక మాకు
దండిగా ఉన్నా విందారగించ
పొందుగా రాగలిగిన దగ్గరి 
బంధువులే కరువాయే ! 

ఏండ్ల కొద్దీ ఏర్పడ్డ అనుబంధమాయె
సుందరమైన ఇందువారపు ఉదయాన్నే 
మంద్రగమనమున ఇంద్ర పదవుల 
వెలగబెట్టాలని మనసు పీకినా మారని 
సెలవుల చిట్టా...!

ఎద్దున్నవాడికి బుద్ధిలేదన్నట్టు
బుద్ధున్నవాడికి ఎద్దులేదన్నట్టు 
డబ్బున్నవాడు ఖర్చు చేయలేక 
లేని వాడికి సంపాదించే మార్గం
కరువాయే ! 

అందివచ్చిన ఖాళీ సమయం 
అరచేతిలో ఉన్నా అంధకారపు
అంచున నక్కిన అగుపడని క్రిమి వల్ల
అందుకోలేని కలల సామ్రాజ్యం! 

ఎదురు చూద్దాం మంచి రోజుకై.... 

నగునూరి రాజన్న
కరీంనగరు.