నాగార్జున సాగర్
31-05-2024
కరుణించగ రావమ్మా
కాంతులీను కృష్ణమ్మా
నల్గొండ పల్నాడుల
సరిహద్దులు నీవమ్మా
నందికొండ జాడల్లో
నగారాలు మోగించగ .....
బిరబిరల నీపరుగు
బీజములు వేయంగా
తలిచిరో మా యమ్మా
తరలించ పంటలకు ....
కరుణించగ రావమ్మా
కాంతులీను కృష్ణమ్మా
నాగార్జున సాగర్ గా
నామకరణం గావించి
బహుళార్ధ సాధకమైన
బహు గొప్ప ఆనకట్టకు
శాతవాహన చరితవు
నాగార్జునుడి నడకనీది…
బుద్ధుడేమో నడయాడే
భువనమందు నీజాడలలో
కరుణించగ రావమ్మా
కాంతులీను కృష్ణమ్మా
కంట నీరు తుడిచిన
బంగారు పంటలే .....
వెలుగులనే పంచేటి
జిలుగుల విద్యుత్తులే ....
పురావస్తు రూపకమున
పర్యాటక రంగములతో…
బహు విధముల మేలుతోడ
బహు గొప్ప కట్టడము....
కరుణించగ రావమ్మా
కాంతులీను కృష్ణమ్మా
హాలికుల దరహాసం
మెరుపులీను నీ చూపుతో....
కుడి ఎడమల కాలువలు
కుబేరములే పంటపొలం ....
లక్షల ఎకరాల బీడుకు
లక్షణముగ నీరందించి
అన్నపూర్ణ చేసినావు
ఆంధ్ర తెలంగాణలను ....
కరుణించగ రావమ్మా
కాంతులీను కృష్ణమ్మా
నగునూరి రాజన్న
No comments:
Post a Comment