నీ మాట తేదీ : 06-09-2021 శీర్షిక : నా కల

 నీ మాట

తేదీ : 06-09-2021

శీర్షిక : నా కల 

కవిత సంఖ్య : 44+3

ఆటపాటల ఆనందాల బాల్యాలను 

బలవంతంగా సాంకేతికతలు 

భళ్ళున లాగేసుకుంటుంటే ...స్వీయ 

నియంత్రణ శిక్షణలతో చిన్నగ 

సాధన చేయాలి తల్లితండ్రులే ...... 

ఉరుకుల పరుగుల జీవితాలకు 

ఉడకేసుకుని తినే తీరికలు లేక 

ఊసురోమంటూ...  ఊరుమీద పడి 

ఉన్నదేదో తినకుండా .... స్వీయ 

నియంత్రణలు పాటించాలి ... 

ఐదంకెల జీతాలంటూ అర్రులు 

చాచి అస్తమానం గణన యంత్రాల 

స్వాధీనం అయినవారు ... అప్పుడప్పుడు 

అయినవారి తీరని బాధలను కూడా 

ఎడబాపే ఆలోచనలు చేయాలి .... 

సాఫ్ట్ వేరులే సర్వస్వం అనకుండా

సంఘం శరణం గచ్చామి అంటూ  

యువత సంఘం.... పాలనలు ... 

దేశం... వైపు కూడా అడుగులేసే దిశగా 

తర్ఫీదులనివ్వాలి .... 

పాలకులైన .... ప్రతిపక్షమైనా ... 

ప్రజలే దైవం....దేశమే పరమోన్నతంగా...

పాలనలోక ఉదాహరణాలై ... ముందు 

తరాలకు మార్గదర్శకమవ్వాలి ... 

అందుకు సరిపడా చట్టాలను అమలు 

చేయాలి.... 

కల్తీలు లేని కలల సామ్రాజ్యం .... 

కాలుష్యమెరుగని కమ్మని ప్రకృతి ... 

కల్మషాలు లేని ప్రజా జీవనం .... 

కలుషితాలు కాని  పాలనలు ..... 

కంటకం కాని అధికార యంత్రాంగం ... 

కర్మను నమ్ముకున్న సైనిక దళం 

నా కల .... 

నగునూరి రాజన్న 

కరినగరము 

చిత్ర కవిత సా స సంఖ్య : 65 శీర్షిక : హరివిల్లు.... ( a big rangoli - muggu )

 చిత్ర కవిత 

సా స సంఖ్య  : 65

శీర్షిక : హరివిల్లు.... 

ఆవు పేడల కల్లాపి జల్లి

ఆకాశ నక్షత్రాలను అలవోకగ 

అవనిపై దించి అందాలను పేర్చే

అనంత నైపుణ్యాల అతివల నేర్పరి.... 

అందమైన రంగుల హరివిల్లు

అలరించే హంగుల విరిజల్లు

బిందువులు మొగ్గల సోయగం

అందంగా బిగించిన కేంద్ర పద్మం 

అల్లిబిల్లి తీగల్లో అలరించే 

కుసుమ మనోహరం.... 

శుచి శుభ్రతలకు నెలవయ్యే

సప్త వర్ణాల సుమ సంగమం 

సుందర దృశ్యాల విరిబోణి 

సుమధుర తేనియల సుందరం.... 

పడతుల హస్తవాసి పదనిసలు

పండగలు పబ్బాలకు ప్రతిబింబం 

సంప్రదాయ ఆస్తుల సరంజామ

మనిషి మనసుకు సంకేతం..

మచ్చలేని చందమామల సాదృశ్యం 

మనోల్లాస గీతికల మాలా చంద్రిక

సరససల్లాపాల సందళ్ళ సంక్రాంతి 

పల్లె పట్టులో నేటికి ప్రతిబింబించే ఘట్టం ....

నగునూరి రాజన్న

కరినగరము. 

చిత్ర కవిత తేది: 09-07-2021 శీర్షిక : రైతు బతుకు

 చిత్ర కవిత 

తేది: 09-07-2021

శీర్షిక : రైతు బతుకు 

కవిత సంఖ్య : 35

బార్టర్ బతుకుల కాలం నుండి 

బండి లాగుతున్న పల్లె సంత 

కాల మార్పులతో కదిలిపోతున్న 

కాలం చెల్లిన ఆత్మీయతల సంత ... 

ఒకప్పుడు చుట్టూ పది ఊర్లకు 

ఉపయోగపడే ఊరి సంత .... 

నేడది పట్టణాలకు పాకినా 

పల్లెనుండి సరుకులొస్తేనే... 

దమ్మిడీకి కొరగాని దళారులకు 

కొని అమ్మితే చాలు లాభాలే లాభాలు ... 

చేతినిండా పని.. జేబునిండా డబ్బు ... 

రైతు కష్టం దండగ  ... వినియోగదారు 

కడుపు నింపదు .... 

కార్మికులు రక్తం చిందించి 

చమట చుక్కలు కారిస్తే వచ్చిన 

వస్తువు ... రంగు కాగితాలు కప్పుకుని 

వాతానుకూల యంత్రాల ముంగిళ్ళలో  

వస్తువుల  ధరలు నింగిలో ఉంటాయి .... 

కాయ కష్టం చేసి కడుపు నింపే 

రైతన్న పంటలు ఎండా వానలకు 

తడుస్తూ... ఎతలన్నీ జత చేసుకుని 

ఎక్కిరింపులు ....పరిహాసాల పందిరే  కిందనే  .... 

కపట పాలకులెప్పుడు  కరుణిస్తారో 

మద్దతు ధరల మాట నీళ్ల మూటలు 

ఎండా , వాన  చలి  ఏదైనా సరే .... 

రైతు బతుకెప్పుడూ  దిన దిన గండమే...... 

 

రాజుల రోజులు పోయి రాజ్యాలు 

మారినా .... దండుకునే దళారీలదే 

పైచేయి ఏనాడైనా .... నోముకున్నోడి 

ప్రసాదం నోచుకున్నోడు తిన్నట్టు ....  

నగునూరి రాజన్న 

కరినగరము 

చిత్రకవిత తేది : 02-07-2021 శీర్షిక : పల్లె తల్లి ( an old lady in a village kitchen trying to cook with firewood)

 చిత్రకవిత

తేది : 02-07-2021
శీర్షిక : పల్లె తల్లి
కవిత సంఖ్య : 34

నాగరికతల నడకలలో యువత
అడుగులు తడబడుతుంటే 
రాజకీయపు రంగుల కోలాటంలో 
పల్లె నీడన బతుకులు  భారమాయె... 

చేతి వృత్తులు మాయమై పోయి
యువత బ్రతుకు చిత్రాలు... ఛిద్రమై 
పట్నపు చత్తుల కింద  పది గజాల
గదులలో కాపలా బంట్లుగా  మారె ...

మాతృ గడ్డపై మమతలు వీడని
పెద్దమనుషులు మాత్రం ఇంకా
చేతులు కాల్చుకుంటూ  కాలం
వెళ్లదీస్తూ శివుని ఆజ్ఞకై వేచుచుండె ...

వట్టి పోయిన పాడి పశువులాంటి
పాటి గాని పాలకుల మాటలు
కడుపు నింపవు సరి కదా ... కనీసం
కంటి వెలుగులు ఇంటికందనీయవు ….

కాంతి నిండుకున్న గదిలోకి
నేనున్నానంటూ పలుకరిస్తున్న
దినకరుని వెలుగులో దివ్యంగా
అవ్వ బువ్వ వండుకొనుచుండె 
ఆత్మ స్థైర్యంగా కట్టెలపొయ్యి పై ....

నగునూరి రాజన్న
కరినగరము

ప్రత్యేక కవిత తేది: 28-06-2021 శీర్షిక: మట్టి మనిషి -మృణ్మయ మౌని వ్రతం

 ప్రత్యేక కవిత 

తేది: 28-06-2021

శీర్షిక: మట్టి మనిషి 

కవిత సంఖ్య : 139

కనుముక్కు తీరుతో కళ్ళకు కట్టి 

కరుణా రసమ్మును కళ్ళలో ఒలికించి 

కారుణ్య మూర్తిగా కళనంతా  వంపి 

కట్టిపడేసెనా మనను కణికట్టుగా .... శిల్పి 

అనుభవాలు ఉట్టిపడుతున్న  

ఆలోచనల అంతరంగం 

అనంతమైన మేథో మధనంతో 

విచారమయమైన వదనం ..... 

మట్టిముద్దలకు ప్రాణంపోసే 

విధాతకు ధీటుగా మెరుగులద్ది                    

పాప బొమ్మకు రూపమిచ్చిన శిల్పి 

నైపుణ్యము అనన్యం అమేయం ..... 

కరోనా కాలపు చదువులకా ?

సంఘంలో సన్నుతించే వివక్షలకా ? 

ఆగమ్యగోచరమౌతున్న ఆలి బతుకులకా ? 

బాదర బందీ లేని భావిజీవితానికా ?

ప్రశ్నేదైనా .... పరికించవల్సిన విషయమే.... 

ప్రజా జీవితంలో ప్రమదకు దక్కుతున్న 

ఫలితాలే ...ప్రశ్నలై వేధిస్తుండెనా పాపకు .... 

ప్రతివారు ప్రశ్నిచుకోవాలంటూ .... 

మృణ్మయ మౌని వ్రతం ...... 

నగునూరి  రాజన్న 

కరినగరము 

పోగొట్టుకున్న చోటే… తేది: 06-09-2021 శీర్షిక : అనుభవాల పందిరి .

 పోగొట్టుకున్న చోటే…

తేది: 06-09-2021

శీర్షిక : అనుభవాల పందిరి . 

కవిత సంఖ్య : 747 

అనుభవాల తోటలో అమిరిన 

ఉవాచలు అన్ని చోట్ల సాధ్య 

పడకపోయినా ... విలువైనవైతే  

వివేకాల తోడునీడలతో  వీలయినన్ని

సాధించుకోవచ్చు  ..... 

కనుమరుగైన అమ్మానాన్నల 

కమ్మని ప్రేమలు కనుగొనలేక 

పోయినా.... అమృతాలు కురిపించే 

అడుగంటిన మానవ సంబంధాలకు 

అత్తరు సుగంధాల పరిమళాల నద్ది 

వికసింపచేసుకోవచ్చు ..... 

వారా ... నేనా .....సంశయాలు వీడి 

ఒక్క అడుగుతో మొదలెట్టి...  వేల 

మైళ్ళ విజయాలను శాశించవచ్చు .... 

కోట్ల బంధాల పరిమళాలను శ్వాశించవచ్చు ..... 

పోగుట్టుకున్న సంపదల 

విషయంలో ... పొరపాట్ల పొట్లము 

విప్పుకుని విశ్లేషించుకుని....  

పొల్లుపోని జాగ్రత్తలన్నీ మూట 

గట్టుకుని అడుగులేస్తే ...... 

ఆరితేర దీసిన అనుభవాల 

పనిముట్లను ఆసరాగా చేసుకుని 

నిత్య జీవన స్రవంతిలో 

ఒక్కోక్క  మెట్టు ఎక్కగలం .... 

ఒదిగి ఎదగి  నిరూపించగలం  .... 

సాధించడం అన్నీ సాధ్యం 

కాకపోయినా .... అదేచోట అన్నీ 

వెతకలేక పోయినా .... అనుభవాల 

పందిరి మాత్రం బతుకు ఆసరా 

అవుతుంది ..... 

నగునూరి రాజన్న 

కరినగరము 

ఉపాధ్యాయుడు తేదీ : 05-09-2021 శీర్షిక : ఊరు మేలు కోరువారు

 ఉపాధ్యాయుడు

తేదీ : 05-09-2021

శీర్షిక : ఊరు మేలు కోరువారు 

కవిత సంఖ్య : 161 

ఊరు మేలు సదా కోరువారు 

ఉపాధ్యాయులై జన్మించారు .... 

ఉడతాభక్తిగ వేతనాలిచ్చినా 

ఉన్నతమైన శిల్పంగా తీర్చి దిద్దు 

శిష్యులను ఉన్నంతలో..... 

బీటలు వారిన మేధస్సులోనైనా 

ఊపిరంతా బిగపట్టుకుని 

వర్ణమాలను పదే పదే ఉచ్చరింప జేసి  

బీజఅంకురాలను నాటే వనమాలి .... 

అమ్మలోని ఆత్మీయతలు 

నాన్నలోని బాధ్యతలు

కలగలిసిన శిల్పమే 

పిల్ల మొక్కలను తీర్చిదిద్దంగా .... 

వ్యవస్థలోని అవస్థలను 

మటు మాయం చేయగల 

సామాజిక వైద్యుడు 

కత్తి పట్టకుండానే యుద్ధం 

చేసి గెలవగల ధీరుడు ..... 

పరికించు పురాణాలు 

పట్టమే ఎపుడు గురువులకు 

దేశ పాలకుడైనా...  ఓ గురువుకు 

శిష్యుడే ....పాలకులు గురువుల 

గౌరవిస్తే ... పండుతుంది 

సమాజమంతా  సస్యశ్యామలమై  ..... 

నగునూరి రాజన్న 

ఉపాధ్యాయ గీతాలు తేది : 04-09-2021 శీర్షిక : మాష్టారు

 ఉపాధ్యాయ గీతాలు

తేది : 04-09-2021

శీర్షిక : మాష్టారు 

కవిత సంఖ్య : 746

మాష్టారు మాష్టారు 

మా మంచి మాష్టారు 

అమ్మానాన్నలు జన్మనిస్తే 

ఆత్మీయంగా  బతుకిచ్చి 

ఆశీస్సులనందించిన 

దేవుడివయ్యా ...ఆ దేవుడివయ్యా    

                                    //  మా //

నలు వైపుల వ్యాపించి 

దేశమంత అల్లుకుని

చిన్నచితక పిల్లలను

చిత్రంగా  చేరదీసి   // మా // 

అమ్మ లా  లాలించి 

నాన్నలాగ మందలించి 

అక్షరాలు నేర్పించి 

సక్కంగా నిలబెట్టావు // మా // 

అపాయాలు తెలిపి నీవు 

ఉపాయాలు బోధిస్తూ  

ఆట పాట నేర్పించి 

నైపుణ్యత పెంచావే ... // మా //

ఎండపొడలు పడకుండా 

నింబ వృక్ష  నీడనిచ్చి 

అడుగడుగున జాగ్రత్తగ 

నడకలు నేర్పించావు  // మా // 

భావి పౌరుల తీర్చిదిద్ది

జాతికీర్తిని  ఇనుమడించి

దేశ భవితను సక్కదిద్ది 
వృత్తులలో నీ స్థానం
ఉన్నత మనిపించావు ... // మా // 

నగునూరి రాజన్న 

కరినగరము 

సంయమన సూత్రం తేది: 03-09-2021 శీర్షిక : నిగ్రహ నీరాజనం

 సంయమన సూత్రం

తేది: 03-09-2021

శీర్షిక : నిగ్రహ నీరాజనం 

కవిత సంఖ్య :  745

మాటకు మాట సమాధానమైతే 

మంత్రించిన వాదులాటలే  కదా 

మంత్రించిన మౌనమే సమాధానమైతే 

మహనీయులు పాటించే సంయనమే ..... 

నాగరికతలలో నడకలు నేర్చుకుని 

పారిశ్రామికీకతలలో పరుగులు పెట్టి 

సాంకేతికతల సౌలభ్య కాల చక్రములో 

స్వార్థాలు మూట కట్టుకుంటున్నారు .... 

లోకో భిన్న రుచిలా ...ఒక్కొక్కరి 

ఆలోచనలు ఒక్కోక్క  రకం....  

ఇల్లైనా ...దేశమైనా ... విశ్వమైనా 

ఇగురంగా కలిసి జీవించాలంటే  

ఇంపైన సంయమనం పొదువుకోవాలి.... 

అప్పుడప్పుడు సంయమనం 

అల్పుల ఆలోచనల మదిలోన 

చేతగాని తనంగా చిత్రీకరణైనా 

అనన్య అంతఃకరణ శుద్ధిమయం .. 

అహపు అశ్వాలకు కళ్లెమేయగలిగితే

ఆలోచనల తరంగాల మధనానికి 

సంయమనం ఒక ప్రత్యేక సంతులిత 

ఆరోగ్య ప్రదాయిని సంఘమునందు…. 

అందరు బాగుండాలి అందులో  

నేనుండాలనే సంకల్పమే స్వర్గతుల్యం ... 

అక్షరాస్యతలు అభివృద్ధి  జరిగితే  

నిగ్రహ నీరాజనాలకు మార్గమౌతుంది 

నగునూరి రాజన్న 

కరినగరము 

చమత్కారం తేది: 03-09-2021 శీర్షిక: లోకకళ్యాణమే ....

 చమత్కారం 

తేది: 03-09-2021

శీర్షిక: లోకకళ్యాణమే .... 

కవిత సంఖ్య : 160 

ఆశ్చర్యానందాలను కలగలిపి 

ఆతిథ్యమిచ్చే అతిథేయుడు 

ప్రతి మాటలో పనిలో పరిహాసాలను 

పదిలంగా పూయించే తోటమాలి ... 

అందరికి అన్నీ సాధ్యం కాకపోయినా 

కొందరికి మాత్రమది కొట్టినపిండి 

సరదాలను పొట్లం కట్టి సావధానంగా 

పది మంది మదిలో పట్టు సాధిస్తాడు .... 

నిత్యకృత్యాలలో నిబిడీకృతమైతేనే 

నీటి మీద తెప్పలా మనిషి జీవితం 

సుతారంగా సునాయాసయంగా 

కడలి తీరం పూవులా చేరుతుంది ...... 

అతి సర్వత్ర వర్జయేత్  లాగ 

హద్దులు దాటితే ఛీత్కారమే ..... 

పరిమితులలో పండించే 

శృతి మించని చమత్కారం 

గతి తప్పని లోకకళ్యాణమే 

నగునూరి రాజన్న 

కరినగరము. 

చిత్ర కవిత 03-09-2021 శీర్షిక : తల్లడిల్లిన తనయుడు

చిత్ర కవిత 

 03-09-2021

శీర్షిక : తల్లడిల్లిన తనయుడు 

కవిత సంఖ్య : 44+2

పాలనలెన్ని పాల ధారల భ్రమలు కార్చినా

పట్టించుకోరు పల్లె జనమును 

వాగ్దానములనెల్ల వడబోసినా 

ప్రోద్బలములీయని పాలకులే .... 

స్వార్థాల సంచులు నింపడమే కానీ 

సకల జనుల సంక్షేమాలన్నీ హుళక్కే ... 

తాగునీటికి ... సాగునీటికి ... కనీస 

సౌకర్యాలకు కూడా  నోచని పల్లెలే  ..... 

పిల్లల సవరించి...ఇల్లు చక్కబెట్ట 

సవ్యసాచులే  తల్లులు  ఎప్పుడూ 

తాగునీటికై బిందె నెత్తిన పెట్టుకుని 

తాను బయలుదేర…. చంకనెక్కె చిన్నది తగుదునమ్మాయంటూ .... 

ఇంతలోనే సంతలాగా...  కనికరము 

లేని కంట్లమొకటి గ్రుచ్చె కాలిలోన ....  

తల్లడిల్లిన తనయుడు తల్లి పాదమెత్తి 

ముల్లు తీయుచుండె కాలునుండి ...... 

ప్రజా పన్నుల పరవశించే పాలకులు 

పట్టీ పట్టని పాలనలను కొనసాగిస్తూ 

తూ  తూ  మంత్రాల ప్రణాళికలల్లుతూ

ఛీ ఛీ గుణశీలతలు పొదువుకుంటున్నారు … 

నగునూరి రాజన్న

కరినగరము

పరిమళాల గాలులు తేది : 02-09-2021 శీర్షిక : అసలైన పరిమళాలు

 పరిమళాల గాలులు

తేది : 02-09-2021

శీర్షిక : అసలైన పరిమళాలు 

కవిత సంఖ్య : 158

పోరాడి గెలిచామనుకున్న యోధులు 

జనులంతా ... స్వాతంత్య్ర సంబరాల 

ఫలాలను తలుచుకుని ఆనందాల 

పండగలు  జరుపుకుంటూండగా .... 

సందట్లో సడేమియాల్లా తల్లి భారతి 

తనువు చీల్చి పంచుకునే వంచన 

తలపులతో కొంత మంది కపట దురాశ 

రాజకీయ పరులు రంగులు పులుముకున్నారు ....  

అంతలోనే స్వార్థాల అధికార మత్తులో 

జోగి సాగిలపడే సర్దారులంతా దేశ 

సంప్రదాయాలను భ్రష్టు పట్టించే 

వ్రత దీక్షలో తలమునకలైపోయారు ..... 

తప్పుడు లెక్కల తక్కెడలన్నీ కూడి తమ 

తమ తప్పులెక్కడ పొక్కకుండా పొల్లుపోని 

రీతిలో జాగ్రత్తలన్నీ కూడా బలుక్కుని 

ఒకటొకటిగా దేశపు తరువు కొమ్మలను  విరిచారు ..... 

ఏడున్నరేళ్ళ దశాబ్ద  గ్రహపాట్ల తదుపరి 

ఒకటొకటిగా విచ్చుకుంటున్న పాప పంకిలాలు 

కంటుంటే వింటుంటే ఒళ్ళంతా జెర్లు పాకిన 

గగుర్పాటులే .... ఒడువని గాథల ముచ్చట్లే .... 

ఇప్పుడిప్పుడే ఒద్దికగా ఒకటొకటి 

చిక్కుముడులు విప్పుకుంటూ పోతున్న 

వాళ్ళను చూస్తుంటే ... అవును అసలైన 

పరిమళాల గాలులు వీచడం మొదలైనదన్న 

నమ్మకం పెరుగుతున్నది....  ...

నగునూరి రాజన్న 

కరినగరము 

రెప్పలు మోయని దుఃఖం తేది: 02-09-2021 శీర్షిక : మనసు దర్పణాలు

 రెప్పలు మోయని దుఃఖం

తేది: 02-09-2021

శీర్షిక : మనసు దర్పణాలు 

కవితసంఖ్య : 744

లెక్క తేలనన్ని సార్లు తెరిచి మూసుకున్నా 

పక్కాగా చేసిపెడతాయి వాటి పని అవి  

ఊహించలేని పరిణామాలను సైతం 

ఊహకందని రీతిన ఒంటి చేత్తో 

ఎదుర్కునే సైనికులవి  ....

 

నమ్మకానికి అమ్మ లాంటివి… 

దేహ దేశానికి రాణా ప్రతాప్ సింహులు 

కంటి  వాకిలికి బోడో గుర్ఖాలు 

ఎంతటి బలశాలికైనా గర్వభంగమే 

వాటి కార్యదక్షత ముందు ..... 

పరితపించే గుండె లయలకు 

స్పందించే మనసు తోడైతే 

కను రెప్పల మత్తళ్లను దాటిపోయే 

కంటి ఊటలకు కరువే ఉండదు … 

ఆనందాల కబుర్లకైనా 

అపాయాల ముచ్చట్లయినా 

కరువుదీర.... వర్షాలు పడినప్పటి 

చెరువు మత్తళ్లయిపోతాయి ..... 

గుండెలు చెరువులై ఉప్పొంగితే 

తలుపులు బార్ల తెరుచుకుని 

బరువులు దింపే బంట్రోతులు 

మనస్సులో ప్రభవించే కల్లోలాలకు 

కకావికలాలకు కనపడే దర్పణాలు .... 

నగునూరి రాజన్న 

కరినగరము 

ప్రేమాలయం తేది: 01-09-2021 శీర్షిక : దేవాలయం

 ప్రేమాలయం 

తేది: 01-09-2021

శీర్షిక : దేవాలయం 

కవిత సంఖ్య: 44+1

అమ్మ నడయాడిన గుమ్మం 

నాన్న  మందలించిన ప్రదేశం 

నానమ్మను తాతాతయ్యను 

ఆదరించిన ఆత్మీయ బంధం ... 

తాతయ్య చేత రూపుదిద్దుకున్న 

తనువంతా తేనెలూరు దేవాలయం 

నానమ్మ చేత పూజలందుకొని 

వారసత్వంగా వాసికెక్కిన లోగిలి .... 

మేనత్తలు మేనువాల్చిన తల్పాలు 

మామయ్యలనాదరించిన మండువాలు 

బావలు వదినలు బహుగొప్పగా 

ఆడుకున్న పరిసరాల పదిలాలు ....

తోబుట్టువులతోడ ఆడుకున్న తోట 

బంగారు బాల్యాన్ని బహుమతించి

విద్యాబుద్దుల సరస్వతమ్మ కృపను 

కుమ్మరించిన విద్యాలయం అది ....

జీవన సహచరులను అందించి

మా కనుపాపల కళ్ళు తెరిపించి

మల్లెపూల సుగంధాలనద్దిన వనమది

మా మంచి జ్ఞాపకాల పోపుల పెట్టె….. 

స్వంత కాళ్ళమీద నిలబడి అక్కడక్కడ

ఎగురుతున్న పక్షులమైన మేమంతా

అమ్మా నాన్నల కనుసన్నల్లో మెదలాలని 

వారికి షష్టి పూర్తి మహోత్సవాన్ని చేసి…. 

ప్రతి మాఘ శుధ్ధ ఏకాదశికి కలియుగ

దైవమయిన రమాశ్రీ సత్యనారాయణ స్వామి

వ్రతంతో…. ఆ ఇంట ఎప్పడూ సంతోషాల 

వెలుగులతో సందడి చేస్తూ అమ్మ నాన్నలతో 

గడిపేవారం…. 

అదే మా ప్రేమాలయం….. 

నగునూరి రాజన్న

కరినగరము. 

మళ్ళీ బడికి తేది:01-09-2021 శీర్షిక: ప్రత్యక్ష తరగతులు

 మళ్ళీ బడికి 

తేది:01-09-2021

శీర్షిక: ప్రత్యక్ష తరగతులు 

కవిత సంఖ్య: 743 

కంటికి కనపడని కపట క్రిమి ఏడాది నుండి

కబాడీ ఆడుకుంటున్నది జీవితాలతో 

కడుపు తీపికో… కట్టుబాట్ల తోడనో…. 

కట్టిపడేసాయి చదువులు.. ఆటలు .... 

నియమాల తోరణాలతోనో లేక 

టీకాలతోనో కొంత సేద దీరినామనిపించి..

ఒకటొకటిగా తెరుచుకొని ఓదార్చుతున్నాయి 

ఇప్పుడిక బడి పిల్లల వంతు వచ్చింది .... 

ఇన్నాళ్ళు సంధికాలపు సాంకేతికతల 

సౌలభ్యాలను అందిపుచ్చుకుని కొంత మేర 

చరవాణి తెరల మమ అనిపినిస్తున్నా

సాంతంగా సాకారమనిపించడంలేదు... 

ప్రభుత్వాలు పచ్చజండా ఊపగానే 

మూలపడిన పుస్తకాలన్నీ ముస్తాబు 

అవుతున్నయి…యూనిఫారాలన్నీ 

ఉతికి ఆరేసుకుని ఇస్త్రీల మడతల్లో

మెరిసి మురిసి పోతున్నాయి .... 

ఎన్నో రోజులనుండీ  ఆశగా ఎదురుచూస్తున్న 

పంతుళ్ళకు ఎంచక్కా పిల్ల చిలకలతో 

ఎదురుపడే ప్రత్యక్ష తరగతుల శుభసూచకం… 

మానవీయతలకు వేదికయ్యే మరోకోణం… 

ఎదురుచూస్తున్నాయి తరగతి తరువులన్నీ

బిల బిల వాలిపోయే చిలుకల కొరకై… 

ఉవ్విల్లూరుతున్నాయి  నల్లబల్లలు 

జ్ఞాన బోధలకై సమాయత్తమౌతూ….. 

బాధాతప్త భయకంపిత హృదయాలతో 

పిల్లల్ని పంపుతున్న  తల్లిదండ్రులకు 

ప్రభుత్వాలు పంతుళ్లే ఇక భరోసాలు నింపాలి 

ప్రత్యేక పారిశుధ్య చర్యలతో సరైన పెస్టిసైడ్లతో .... 

నగునూరి రాజన్న

కరినగరము 

గోకులాష్టమి తేది: 31-08-2021 శీర్షిక: కన్నయ్య ...

 గోకులాష్టమి 

తేది: 31-08-2021

శీర్షిక: కన్నయ్య ... 

కవిత సంఖ్య : 742

కరుకు రక్కసుల నడుమ 

కఠిన పాషాణపు చెరసాలలో 

కన్ను విచ్చుకున్న నీ మోము 

తలచి కంట నీరే కదా కన్నవారికి .... 

మధురలోన జన్మించిన 

దేవకీవసుదేవుల కన్నబిడ్డ 

గోకులంలో పెరిగి పెద్దయిన 

నందయశోదమ్మల గారాలపట్టి .... 

అల్లరి కృష్ణయ్య నీ చిలిపి చేష్టల 

గోపెమ్మలను ఆట పట్టించినా 

అచ్యుతుడన్న అవ్యాజమైన ప్రేమే 

కదా గోకులములోన అందరికి  .... 

ముప్పులెన్ని పొంచి ఉన్నా 

ఎప్పటికప్పుడు తప్పక వచ్చే తిప్పళ్లని 

ముసి  ముసి నవ్వులతోనే తప్పిస్తూ 

తోటి వారిని కాచిన కృష్ణయ్య .... 

మన్ను తిన్నాడన్న ఫిర్యాదుతో 

మందలించిన యశోదమ్మకు 

మాయ చేసి మహీతలమును 

భువన బాండములను చూపగ 

మదిన మేము మురిసితిమయ్యా .. ....

కాళీయ మర్దనం గావించి

గోవర్ధనమునెత్తి గోపాలుర కాచి 

ఇంద్ర గర్వ భంగము గావించి 

ఇల వరుసలో కంస చాణూర సంహారములు 

కావించి ... కన్నవారి శృంఖలాలు 

బాపగ .... కళ్ళు చెమర్చితిమి ......  

అష్టభార్యలను ఇష్టసఖులుగా 

పొందినా ... పదహారు వేల మంది 

గోపికల మదులు దోచిన 

అమలిన శృంగార రసజ్ఞుడిని 

తలచి మనమున ఆనందించితిమి ..... 

కురు సంగ్రామమున పాండవుల 

పక్షమున నిలిచి... ధర్మమునకెపుడు 

దాపుగానిలిచిన  దాఖలాలు కని 

దర్శన భాగ్యము కొరకై  ప్రతి  ఏట 

నీ పూజలే కదా కన్నయ్యా   ..... 

నగునూరి రాజన్న 

కరినగరము 

జాజిపూల జావళి తేది : 30-08-2021 శీర్షిక : అమర ప్రేమ

 జాజిపూల జావళి

తేది : 30-08-2021

శీర్షిక :  అమర ప్రేమ                                         

కవిత సంఖ్య : 741

స్వచ్ఛమైన మనసులకు 

మాత్రమే సరళంగా అర్ధమయ్యే 

సర్వజితుని అనంత  ప్రేమలు 

సఖి రాధమ్మతో కూడి ...... 

యాదవేంద్రుని జ్ఞాపకాలే 

వేణుగానం మదిలో మోగుతున్నట్టు 

శిఖపించ మౌళి పింఛం  

ముఖ బింబంపై  పారాడినట్టు .... 

అల్లనల్లన కదులుతున్న 

చల్లని గాలి సైతం గమకమై 

మేను తమకమౌతుంటే 

మదిలో వీణలు మోగగా ..... 

వయ్యారాల అడుగులు 

సవ్వడి చేస్తుంటే .. వాలు 

జడల జాజి పూలు జావళీలు 

పాడుతుంటే.... కనులు మూసినా 

తెరిచినా రాధమ్మకు కృష్ణుడే ..... 

నగునూరి రాజన్న 

కరినగరము 

గతాన్ని తరచి చూడు తేది : 30-08-2021 శీర్షిక : అనుభవాల పెట్టె

 గతాన్ని తరచి చూడు 

తేది : 30-08-2021

శీర్షిక : అనుభవాల పెట్టె 

కవిత సంఖ్య : 30+14

జీవితమంటే గెలుపోటముల 

ఆటమైదానమే.....  

జ్ఞాపకాల తుట్టె తేనెటీగల పెట్టె  

అమ్మానాన్నల ఆత్మీయతల తరగలు 

తోబుట్టువుల అనురాగ బంధాలు 

మిత్రుల దండుతో పోరిన క్షణాలు 

బాల్యములో  అల్లుకున్న ముచ్చట్లు ... 

ఎన్నెన్నో విజయాలను 

మూటకట్టుకున్న ముచ్చట్లు 

ఆనందాలను అక్కున 

చేర్చుకుని సంతోషించిన 

సందర్భం..... 

నెమరు వేసుకున్న కొద్దీ 

నెమలీకల అందాలే ..... 

అలనాటి అనుభవాలన్నీ 

ఆనందాల పోపులపెట్టే ...... 

అప్పుడప్పుడు ఆవహించే 

అలసత్వపు క్షణాల ఫలితాలో 

నిర్ణయించుకున్న అంచనాలను 

అందుకోలేని తారుమారులో ..... 

అనుభవాల పాటాలను 

దివిటీలుగా మార్చుకుని 

ధృడ సంకల్పాల గమ్యాల 

గుమ్మపాలను నిర్దేశించుకుని .... 

స్వంత బలాబలాలను 

బేరీజు వేసుకుంటూ

గమ్మత్తైన గమన మార్గాలను 

నిర్దేశించుకుని విజయాల   

పూదోటలను వశ పరుచుకోవాలి ......  

నగునూరి రాజన్న 

కరినగరము 

శ్రీ కృష్ణాష్టమి తేదీ - 30-08-2021

 శ్రీ కృష్ణాష్టమి

తేదీ - 30-08-2021             

శీర్షిక : గీతాచార్యుడు ... 

కవిత సంఖ్య : 158    

వసుదేవ సుతం దేవం - 

కంస చాణూర మర్దనం
దేవకీ పరమానన్దం - 

కృష్ణం వందే జగద్గురుమ్

దేవకీ వసుదేవుల అష్టమ 

గర్భంగా ... శ్రావణ బహుళ 

అష్టమి తిథి రోహిణి నక్షత్రం 

పరంధాముని జననం ….. 

నందగోకులంలో పెరిగి 

యశోదమ్మ ముద్దుల తనయుడై 

మన్ను తిన్నాడని మందలించ 

అండ పిండ బ్రహ్మాండములను 

చూపి అమ్మకు ఆనందాశ్చర్యములను 

కలిగించిన అల్లరి పిడుగు ..... 

కాళింది పై నాట్యమాడినా 

గొల్లభామల చీరలెత్తుకెళ్లినా 

గోవర్ధనగిరినెత్తి ఇంద్రుని 

గర్వమణచిన ఇగురాశాలి ..... 

అనుక్షణం  పాండవుల 

నంటిపెట్టుకున్న ధర్మ పక్షపాతి 

ద్రౌపదమ్మకు వస్త్రాపహరణంలో 

రక్షించిన అనుంగు సోదరుడు .....                        

దుష్ట శిక్షణార్థం శిష్ట రక్షార్థం 

అవతరించిన లీలావతారం

ద్వాపార లో దర్శన భాగ్యం 

గీతాచార్యుడిగా సత్యదర్శనం…. 

నగునూరి రాజన్న 

కరినగరము 

అమ్మ భాష తేదీ : 29-08-2021

 అమ్మ భాష 

తేదీ : 29-08-2021

సంఖ్య : 30+14

మాతృ భాష తెలుగు

మన మాతృ భాష తెలుగు 

మరువకెపుడు దాని వెలుగు 

అమ్మ నోట రాలిన ముత్యం 

అభ్యసించి నేర్చిన సత్యం 

అమ్మ భాష తేనెల మధురం 

ఆర్తినంత రంగరించు భావం ... //మాతృ//

అక్షరాలన్నీ వర్తులాకారం 

అనువైన సులువు ఉచ్చారణం 

అచ్చులలోన  పొట్టీ పొడువులు  

హల్లుల్లోన సరళ పరుషములు  //మాతృ//

ఒత్తులన్నీ ద్విత్తం సంయుక్తం 

అక్షరాలను  కలిపిన గుణింతం 

అచ్ఛులతోనే  పదాలు అంతం 

విశ్వమందు ఆది ద్వితీయం  //మాతృ//

అధ్యయించు పర భాషలు 

అన్వయించు అవసరార్థం

అమ్మిచ్చినది  నీకు జననం  

అమ్మ భాషే నీకు అస్థిత్వం  //మాతృ//

అమ్మయినా అమ్మ భాషైనా 

ఆనవాళ్లనెపుడూ  మరవద్దు 

మననమెంతో మనసు ప్రియం 

తలుచుకుంటేనే జన్మ సౌఖ్యం  //మాతృ//

నగునూరి రాజన్న 

కరినగరము 

లలిత గేయాలు తేది: 28-08-2021 శీర్షిక : గంగమ్మ తల్లి ….

 లలిత గేయాలు 

తేది: 28-08-2021

శీర్షిక : గంగమ్మ తల్లి …. 

కవిత సంఖ్య: 740

అందమైన భారతికి 

మందారమే గంగమ్మ  

విందామా మనమంతా 

మనసుపెట్టి పయనాన్ని ....

చిన్నాపెద్ద ఉపనదులు 

చిందులేసి పయనించి 

చిత్రంగా కలుసుకుని 

గంగమ్మగా రూపమెత్తె  ...

భాగీరథి బయలెల్లే 

గంగోత్రిలో పయనమయ్యి  

అలకనంద కలుపుకుని 

గంగమ్మగ  మారిపాయె ...... . //అంద//

పిండారి మందాకినీ 

పిలుపులతో పలికెనే 

ఒళ్ళంతా పులకరించు 

గంగమ్మను తలవగనే 

చంబల్  బెత్వాలను 

చేరదీసి యమునమ్మ 

చేరి కలిసె గంగమ్మను 

చెలిమితోడ ప్రయాగలో ..... . //అంద//

ఎన్నెన్నో రాష్ట్రాలను 

చుట్టుకున్న గంగమ్మ 

సాగునీరు తాగునీరు 

సకలమంతా తానేగా ...

వారణాసి చుట్టుముట్టి 

పాట్నాగుండ పరుగెత్తి 

ఫరక్కాను సృశించి 

బంగాలును  దాటేసి.... ..  //అంద//

 

సన్నుతించి కనికరించి 

సముద్రాన కల్సిపోయే .... 

విందామా మనమంతా 

మనసుపెట్టి పయనాన్ని .... //అంద//

నగునూరి రాజన్న 

కరినగరము 

చిత్ర కవిత తేది : 27-08-2021 శీర్షిక : తరువు సూచనలు ....

 చిత్ర కవిత 

తేది : 27-08-2021

శీర్షిక : తరువు సూచనలు .... 

కవిత సంఖ్య : 30+13

ప్రతి నిమిషం పరితపించే 

తరువు... మరకతముగా అవనిని 

శోభింప చేసి... శోశంతా ఉగ్గబట్టి 

తనువంతా సమర్పింపింపచేసి

జీవకోటికి ఉపకరించు నిలువెల్లా .... 

పంచి ఇవ్వడమే పరమావధిగా 

పెట్టుకున్న ప్రకృతి మాత  ప్రతినిధి 

జీవకోటి ఆకళ్ళను తీర్చుతూ ఆవాసంగా 

ఆదుకుని ఔషధాలను ప్రాణవాయువిచ్చే పచ్చని చెట్లు....  

నాగరికతల పేరుతో అడుగులేసి 

నరికివేత మొదలెట్టిన మానవుడు 

స్వార్థాలను తలకెక్కించుకుని 

పారమార్థాలన్నింటికి  తిలోదకాలిచ్చె ... 

నడుస్తున్న కాల చరితలో... 

నడమంత్రపు తలబిరుసు సిరులొ ... 

మానవత్వం మరిచిన మనుషులు  

మమతల తావిని గుర్తించలేకపోతుండే  ..... 

పచ్చని చెట్లపై పడగ నీడలా 

పగబట్టినట్టు మనుషులేమో 

వెచ్చని విషం కక్కుతూ ఉసురు

తీస్తున్నారు అడ్డంగా నరుకుతూ ..... 

వేడెక్కి మరుగుతున్న వాతావరణం... 

పాడెక్కి పరితపిస్తున్న పర్యావరణం ... 

మనిషిలోని మార్పులకై  ఎదురుచూస్తూ 

మనందరికి సూచనలిస్తునే ఉన్నాయి  ..... 

పంచదార పలుకులు తేది : 27-08-2021 శీర్షిక : మధుర సుధలే ....

 పంచదార పలుకులు

తేది : 27-08-2021

శీర్షిక :  మధుర సుధలే .... 

కవిత సంఖ్య : 739

ప్రేమలో కూరుకుపోయిన 

జంటలకు నిద్దరే రాని పొద్దెరుగనితనమే 

ఒకరి మాట ఇంకొకరికి చక్కెరవెయ్యని 

చిక్కని తీయనైన  మధుర వంటకాలే  ..... 

 

నూతనమున వధూవరులకు 

ఎడతెరిపిలేని ఎన్ని ముచ్చటైనా 

ఒయాసిస్సులను  తలపించే 

తేట తెల్లపు చెలిమెల నీటిమూటలే .... 

బుడి బుడి అడుగుల పరుగెడ్తూ 

బుల్లి బుల్లి మాటల ఊకొడుతూ 

బోసినవ్వుల కన్నయ్యల మాటలు 

తేనెలూరించే కమ్మని ఖర్జూరాలే  .... 

పెద్దలు చెప్పే బ్రతుకు పాఠాలు 

భరోసానిచ్చే గుండె నిబ్బరాలు 

మంచిని బోధించే సుద్దిబుద్దులు 

ప్రవచనాల పంచదార పలుకులే ..... 

రస రమ్యమైన రాచ కావ్యంగా 

రాణించాలంటే..... 

చమత్కారముల చక్కిలిగింతల 

రంగరింపులతో .... 

వైవిధ్యాలనొలకబోసే శీర్షికలతో 

చెరుకుగడలాంటి చక్కటి ఎత్తుగడలతో ... 

పళ్లరసాల్లాంటి పదబంధాలతో 

పండంటి శోభలను పదిలపరుస్తూ... 

 

కలకండలాంటి కమ్మని భావాల పంటతో 

నూతనత్వాల సృజన శిల్పంతో 

అనంతమైన అంశాలను  భర్తీ చేస్తూ 

సహజసిద్ధమైన సందర్భాలతో ... 

మల్లెతీగలా అల్లుకునే అర్హమైన 

అందమైన సుందర భావాలతో ... 

అర్థవంతమైన ముగింపులతో 

ముడివేసుకున్న....  చేయి తిరిగిన 

సాహిత్యకారుని కవితాపుష్పం కూడా

అచ్చెరువొందించు అలవోకగా 

పంచదార పలుకులై .....

నగునూరి రాజన్న 

కరినగరము 

మారని పొద్దు

 మారని పొద్దు

శీర్షిక:  కర్షకుడి కార్మికుడి బ్రతుకు పొద్దు… 

కవిత సంఖ్య : 157

నాగరికతలతో నడకలు నేర్చి 

పారిశ్రామికతలతో పరుగులు పెట్టి

సాంకేతికతల సొబగులద్దుకుని 

గ్రహాంతరాలకు పయనమౌతున్నాడు ... 

రాజుల రోజులు పోయి 

రాజ్యాల రూపు రేఖలు మారినా 

రాళ్లు రప్పలు మోసే 

కూలీల బ్రతుకులు మారేనా... 

జాగీరులు చేవ చచ్చి 

జమిందారీ పద్ధతులు మారినా 

జగమెరిగిన కష్టజీవి 

కర్షకుని బ్రతుకు మారేనా.... 

సామ్యవాదం పేరు చెప్పి 

ప్రజాస్వామ్యం నెలకొల్పినా 

సాగుతుందా సగటు శ్రామికుని 

బ్రతుకు దెరువు సజావుగా... 

కమ్యూనిజం కుప్పకూలి 

కామాందులు మారిపోయినా  

రెక్కాడితే గాని డొక్కాడని 

బక్కోడి అసలు బ్రతుకు మారేనా... 

రాజరికం, ఫెడరలిజం, 

జాగీర్దారీ, జమిందారీ,

సామ్యవాదం, ప్రజాస్వామ్యం,

కమ్యూనిజం, కాపిటలిజమ్..... 

 

పేరేదైనా, రాజ్యమేదైనా మారనిదొక్కటే 

కర్షకుడి కార్మికుడి బ్రతుకు పొద్దు… 

పదే పదే దోపిడీకి గురౌతున్నరనేదే   

అందరికి తెలిసిన అంతిమ పరమ సత్యం...... 

రాజ్యాంగాలెన్ని మార్చినా, 

చట్టాలెన్ని తెచ్చినా నిరుపయోగమే 

వ్యవసాయంలో కర్షకునికి, 

వాణిజ్యం లో కార్మికునికి 

సరైన వాటాలు దక్కనిదే ....... 

నగునూరి రాజన్న

కరినగరము.

ప్రేమ ప్రయాణం తేదీ 26-08-2021

 ప్రేమ ప్రయాణం 

తేదీ 26-08-2021

శీర్షిక :  అందమైన సుందరం 

కవిత సంఖ్య : 738

వయసు వంక తీర్చినట్టు 

కనులలో మెదిలిన రూపం 

కనికట్టు చేసి మదిలో 

ఓ కమ్మని రూపం పరుచుకుంది. ... 

మాటలు వినపడితే చాలు 

మంత్రముగ్దతలను విరజిమ్మి 

రూపం కనపడితే చాలు 

ఓపని భావనాలకు లోనవుతూ .... 

పారదర్శకమైన మనో తెరపై 

పనికట్టుకుని చిత్రం గీసి 

పగలు రేయిలను కలిపేసి 

పనులు చేయకుండా పెనుగు 

లాడుతుంది ..... 

మరిచిపోకుండా ... మరీ మరీ 

గుర్తుకొచ్చి మారాములు చేసి 

గోముగా ఏదైనా వినాలనే 

తపనలను పంచుతుంది .... 

ఎవరేమి చెప్పినా విననీయదు 

ఎవరడ్డువచ్చినా  కోపమే ... 

అనుభవజ్ఞులు  చెప్పిన మాట 

అనుభవ శూన్యమన్న భావన .... 

సుఖ ప్రయాణమైతే 

సుందరమైన ఆనందమే 

విశ్వమంతా వినోదమే ..... 

వినీలాకాశంలో విహరిద్దాం .... 

నగునూరి రాజన్న 

కరినగరము 

ఆగమనానందం తేదీ : 25-08-2021

ఆగమనానందం 

తేదీ : 25-08-2021

శీర్షిక : మధురమైన ఎదురు చూపులు 

కవిత సంఖ్య : 737

పాలకుల పాటి పనితనములో 

పారిశ్రామికతల పరుగులు దాటి 

సాంకేతికతల సంధి సమయంలో  

సొబగులద్దుకునే  సౌలభ్యాలో ... 

తొంబదుల్లోని తమ్ములందరికి 

వామ హస్తం దీవెనల పాలైపోయి

వరుసకట్టిరి వానప్రస్థానికై పరదేశం

వామనుడు బలిని పంపిన ప్రాంతం  .... 

వందల వేల కుటుంబాలలోని

వారసులంతా వలస వెళ్ళిరి... 

తమను తాముగా రూడీపరచుకొనగ

దేశ కీర్తిలో కలికితురాయిగా  నిలువ…. 

దేశంకాని దేశమెల్లినా ...తరువులై 

చిగురిస్తూ పరువుగా పదిమందిలో 

నిలిచి గుండెలు చిక్కబట్టుకుని 

దేశ ఉన్నతిలో దశలు మార్చిరి ....

ఏండ్లకేండ్లు ఎదురు చూచిన

కన్నవారికి... మధురమే వారి ఆగమనం 

జీవితాన వసంతమే .....మత్త 

కోకిలల కుహూ కుహులే ... 

గ్రీష్మపు ఎండలకు తల్లడిల్లి 

తనువున నెర్రెలూనిన అవని 

మాతకు ... తొలకరి చినుకుల 

పరిమళాలల్లే ....హాలికుని కళ్ళల్లో 

అనంతమైన మెరుపు కాంతులల్లే .... 

నగునూరి రాజన్న 

కరినగరము 

 

దశగుణనిధి తేది : 24-08-2021

 దశగుణనిధి 

తేది : 24-08-2021

కవిత సంఖ్య : 30+12

దాశరథీ దశ గుణ నిధీ

తేట తెలుగువారి పెన్నిధి.  

విప్లవాల గడ్డ తెలంగాణ ముద్దు బిడ్డ 

బ్రహ్మ శ్రీ వెంకటాచార్యులు 

శ్రీమతి వెంకటమ్మ గార్ల కన్న బిడ్డ .... 

అపురూపమైన అన్నకు తగ్గ తమ్ముడు 

తెలంగాణ సాయుధ పోరాటాల 

ముందటి  ఉనికిని, నడకను, 

అంతరాలను....చిల్లర దేవుళ్ళు, 

మోదుగుపూలు జనపదం లో

జాగృత పరిచారు ..... 

అన్నగారి సాంగత్యంలో అభ్యుదయ 

భావాలను అలవర్చుకుని 

అసమానతలను, అణిచివేతలను 

ఎండగట్టారు.  

నిజాం పాలనలను, గడీల దొరల 

రాక్షస పాలనలను నిలువు 

దోపిడీలను  నిలువునా ప్రశ్నించి 

ఎదురు నిలిచారు.  

కమ్యూనిష్టుగా కొంత ముద్రపడినా 

వేదం-జీవననాదంగా  తెలుగులో అందించి

ఆధ్యాత్మికతలను అవపోశన పట్టి

అతి సరళతలో మహాభారతం రామాయణం 

అందించి అతిరథ మహారథి అనిపించుకున్నాడు.  

నగునూరి రాజన్న 

పూల వర్షం తేది :24-08-2021

 పూల వర్షం 

తేది :24-08-2021

శీర్షిక : నవ సమాజ నిర్మాతలు 

కవిత సంఖ్య : 156

యుగాలు మారినా జగాన తేజం 

రఘురాముని పాలనే ఘన దృష్టాంతం 

అడవికి వెళ్తున్నా ఆగని ప్రేమలు 

గుండెల్లో కోవెల కట్టి కురిపించిరి 

పూలవర్షం  ప్రజలు .... నాడు 

వలస పాలకుల అభ్యాసములో 

కల్తీ చదువుల జ్ఞాన సంపదలో ... 

అయినా మారని నేటి పాలకులు 

యావంతా పచ్చకాగితాల పైననే  .... 

పాలకులంటే ప్రజాసేవకులని 

పుస్తక నిర్వచనాలు ప్రవచనాలు.... 

అధికారాపక్షమైతే హద్దులెరుగదు 

ప్రతిపక్షాలకైతే పట్టింపులు లేవు ..... 

సంక్షేమలంటూనే సంఘాన్ని 

చీల్చడం.... లాజిక్కులు లేని 

లా పాయింట్లు ముందుంచి 

కపట జిమ్మిక్కుల కళా ప్రదర్శనలు  ....  

ప్రజలలో చిచ్చు రగిల్చయినా 

పబ్బం గడుపుకోవాలనుకోవడమే 

పాలనలు గాలికి వదిలయినా 

ప్రతిపనిలో  క్విడ్ ప్రోకో  లేనాయే  ... 

ఆవగింజంత ఆదర్శభావమో 

నువ్వుగింజంత అంకిత భావమో 

కానరాక  ప్రజలంతా విస్తుపోతుంటే 

మేమేమి తక్కువ కాదంటూనే .... 

ప్రజల కళ్ళల్లో కారం కొట్టి 

కలిగించుకున్న దాంట్లో తృణమో 

పణమో కాసింత ఖర్చు చేస్తూ .... 

సొంత పూలవర్షాలకు కొంత ఊరటలు...   

చెందె నేటి నవ సమాజ నిర్మాతలు ..... 

 

నగునూరి రాజన్న 

కరినగరము 

తామరాకుపై తేదీ : 24-08-2021 శీర్షిక : నీటి బొట్టు వంటిది ....

 తామరాకుపై

తేదీ : 24-08-2021

శీర్షిక : నీటి బొట్టు వంటిది .... 

కవిత సంఖ్య : 736

ఆల్చిప్పలో పడితే అదృష్టమే 

స్వాతి ముత్యమై సంతసించవచ్చు .... 

తామరాకు మీద పడితేనే ...తండ్లాటా 

మరోనిమిషం... ఏంజరుగుతుందో ... 

తాను పడిపోతానని  తెల్సినా 

ఉన్న ఒక్కక్షణం తళుక్కున 

మెరిసి ... కాంతులీనుతూ .... 

మనుషులకు మరుపునిస్తుంది 

మనసులను మురిపించి రంజింప 

జేస్తుంది ..... 

సప్తవర్ణాల శింగిడిలో మునిగి 

తేలే లోపే జీవిత ప్రపంచాలు 

అంతమౌతుంటే .... ఎందుకో 

మనిషి మార్చుకోలేక సతమత 

మౌతూ కొట్టుమిట్టాడుతున్నాడు .... 

కలల ప్రపంచంలోనే కదలాడుతూ 

కలి మాయల నీడలలోనే 

బాధ్యతల ముసుగులేసుకుని 

బంధాల చట్రములో నిలిచి 

"నేను" అనుకుంటూ సాగుతున్నాడు 

విజ్ఞాన వివేచనలు తోడు చేసుకోని 

గతించిన చరితల గమనాలను 

పరిశీలించి ... గమనం దిద్దుకొని 

గమ్యం నిర్దేశించుకుంటే సుఖాంతమే  ..... 

 కదా .... 

నగునూరి రాజన్న 

కరినగరము 

నింగి - నేల తేది : 23-08-2021

 నింగి - నేల  

తేది : 23-08-2021

శీర్షిక : కలవని బంధువు 

కవిత సంఖ్య : 30+11

అల్లంత దూరాన అలుముకున్న 

ఆగమ్య గోచరమైన అంబరం 

అంటిపెట్టుకున్నది గొడుగై 

అవని తల్లి పైన జీవ ఉనికికి 

ఆధారభూతమై ..... 

నీలాంబరిగా నిత్య దృశ్యమై 

శశి భానుల రష్మిలను ప్రసరిస్తూ 

జీవకోటి జవనాడులకు ప్రాణం 

పోస్తూ ... ఫరిడవిల్లవింపజేస్తూ

అనుసంధానతను నిలబెడుతుంది .... 

పుష్కలమైన నక్షత్ర పూలకు 

పురిటిగడ్డయి.. నిలువెత్తు విజ్ఞానాలకు ...

నిష్కల్మష వినోదాలకు.... 

నిలువుటద్దమై ప్రతిబింబిస్తుంది 

గ్రీష్మ తాపాలను భీష్మంగా 

ప్రసరింప జెసి .... 

సంద్రముల నీరంతా తాను 

తస్కరించి ... 

అవనిపైన చినుకు పూలవాన 

కురిపించి ..... 

పచ్చ తివాచీలు పరుస్తుంది ..... 

తొలకరిలో రేగిన మట్టి వాసనలను....  

భూసురమైన వసంతాలలో 

కుసుమ కోమలమైన ....భూదేవి శోభలను 

కనులారా వీక్షిస్తూ..... తనువారా 

సంబరమే ... అంబరానికి ..... 

నిత్యం కలుసుకోక పోయినా 

సత్యంగా కను దృష్టి నుండి తప్పుకోక .... 

అలసటలు నీరసాలు  మరిచి 

అవినాభావ సంబంధమై అల్లుకున్న 

కలుసుకోని  బంధువు ....  

 నగునూరి రాజన్న 

కరినగరము 

కదిలే కాలం తేది: 23-08-2021

 కదిలే కాలం 

తేది: 23-08-2021

శీర్షిక: గమ్యం 

కవిత సంఖ్య: 155

ఆకులు అలములు ఆశ్రయించుకుని 

కందమూలములు జీర్ణించుకుని 

రాతి యుగములు రంగరించుకుని 

అడుగులు వేసిన ఆటవికుడు .... 

కొండ గుహలలో నివసించి 

రాతి పనిముట్లు కనిపెట్టుకుని 

పచ్చిమాంసాలు పంచుకుని 

కడుపులు నింపుకున్న కథలేనాయె .... 

సంఘటితమైన నివాసాలతో 

సాహాసాల ఊపిరులూదుకుని 

పట్టణాలుగా ఫరిడవిల్లుతూ 

పారిశ్రామిక ప్రగతి బాటలో అడుగులేసె…. 

సాంకేతికతలు సంధించుకుని 

గగన విహారములో దూసుకెళ్ళి

గ్రహాంతరాలకు పయనమైనా … 

పచ్చినెత్తురు వాసనలు వదలని 

పామరుడేనని ఋుజువులాయె 

అక్కడక్కడ…. అప్పుడప్పుడు …. 

ఆగని కాలానికి ఎవరూ గాలం  

వేయలేకపోయినా ... 

అందరూ అందిపుచ్చుకుని నడకలు

సాగిస్తే…ఎంతోకొంత పురోగతేనంటూ .... 

గమ్యం చేరుకునే గమ్మత్తు..... లేదంటే 

మళ్ళీ మొదటి దశకు చేరుకునే 

దిగజారుడు తనమేనాయె….. 

నగునూరి రాజన్న

కరినగరము.   

చివరకు గెలిచేది ... తేదీ : 23-08-2021 శీర్షిక : నీతి నిజాయితీలే ...

 చివరకు గెలిచేది ...

తేదీ : 23-08-2021

శీర్షిక : నీతి నిజాయితీలే ... 

కవిత సంఖ్య : 735

తాత్కాలికంగా తామే  

గెలిచామని... గెలుస్తున్నామని 

గొప్పలు పోయినా .... 

అన్యాయానికి తెలుసు 

అంతమౌతానని .... 

అక్రమానికి తెలుసు 

తెగ నరకబడతానని.....  

అధర్మానికి తెలుసు 

నిలవలేనని.....  

అవినీతికి తెలుసు 

చితికి పోతానని .... 

చెడుకు తెలుసు 

ఎక్కువ కాలం బతకలేనని .... 

అయినా మేకపోతు గాంభీర్యాలతో 

నటిస్తూ .... కాలం నెట్టుకొస్తూనే 

ఉంటాయి ....మనిషిలోని అహాల 

నీడలలో ఒదిగిన కపట 

కరటక దమనకుల్లా  

సదా సహకారాలందించగా ....  . 

అనుభవజ్ఞుల నోట  ప్రతి పూట  

ఆలకిస్తూనే ఉంటాము....... 

ధర్మం మనల్ని ఉద్ధరిస్తుందని 

న్యాయం అందరికి క్షేమమంటూ 

సత్యం  చాలా గొప్పదంటూ 

మంచిని మించింది లేదంటూ 

నీతికి అంతా భీతిల్లాల్సిందే నంటూ 

నిజాయితీకి ఎప్పుడూ పెద్ద పీటే నంటూ 

పాలలో దాగినా నెయ్యిలా 

పరిణతి చెందితే గాని ..... 

పరిపక్వతగా బయల్పడదనీ .... 

సంకల్పం  నీతి సూత్రమైతే ... 

దృఢదీక్ష ధర్మ యుక్తమైతే 

గమనం న్యాయ పూరితమైతే 

పట్టుదల క్రమశిక్షణ సత్యపూరితమైతే 

ఫలితమెప్పుడూ నిండుగా కాసిన 

తరువులా సంపూర్ణమౌతుంది ..... 

నగునూరి రాజన్న 

కరినగరము 

రక్షాబంధన్ తేది: 22-08-2021 శీర్షిక : అభయ హస్తము

 రక్షాబంధన్ 

తేది: 22-08-2021

శీర్షిక : అభయ హస్తము 

కవిత సంఖ్య : 734 

సంస్కృతీ  సంప్రదాయాల 

చరిత్రల నీడలలో... అవిభాజ్య 

కుటుంబాల ఆలనలలో.... 

అనురాగాల తోటలలో పెరిగిన దేశం .... 

ఆత్మీయతలకు ఆయువు పట్టు 

అనుబంధాలకు పుట్టినిల్లు 

వారసత్వాలకు పెట్టనికోట 

కొదువలేదు మన హైందవాన .... 

అమ్మానాన్నల ఆత్మీయతలు 

తోబుట్టువుల మధ్య ప్రేమలు 

పొరుగులతో  ఇరుగు బంధాలు 

ప్రతీది ప్రత్యేకమే భారతానా .... 

లక్ష్మీనారాయణులను లాలిత్యమై 

ఆదిదంపతులను ఆరాటంతో 

ప్రాణప్రదంగా పూజించెను... శచీదేవి 

తనభర్త క్షేమం కోరి ప్రథమంగా ..... 

కృష్ణుని చూపుడువేలుకు తగిలిన 

గాయానికి గుండె చెరువయిన ద్రౌపతి 

కన్నీటి పర్యంతమయి  కట్టుకట్టే నాడు 

బంగారి కొంగును బరబరా చింపి ….. 

శ్రావణ పౌర్ణమి శ్రేష్టమాయె 

అభయ హస్తలే మూలమయి నిలిచె 

రక్షా బంధనాల రతనాల కథలకు …..నాడు

నగునూరి రాజన్న

కరినగరము. 

చిత్ర కవిత తేదీ : 21-08-2021 శీర్షిక : చంద్రవదన

 చిత్ర కవిత

తేదీ : 21-08-2021

శీర్షిక : చంద్రవదన  

కవిత సంఖ్య : 30+10

సకల స్త్రీల సంక్షేమకారిని 

అమ్మ  జగజ్జననే  పూనుకుని 

శివయ్యను ప్రాధేయపూర్వకంగా  

ఆనతీయమనే అనువైన పూజ .... 

శ్రీ పీఠే సుర పూజితే 

పద్మ హస్తే జగద్ధాత్రి 

పావన రూపే మాతా 

పాహిమాం పాహిమాం .... 

పద్మాసన స్థితే దేవి 

చతుర్  హస్త దేవి 

పరబ్రహ్మ స్వరూపిణి 

పరమేశి జగన్మాత://

విష్ణోరురసి స్థితాయై 

లక్ష్మీ కమలాలయాయై 

త్రిభువన భూతికరి  

దామోదరవల్లభాయై //

అష్ట లక్ష్ములుగా కొలువై 

అభయాలనొసగే  తల్లీ 

అనువైన రీతిలో భక్తుల 

బ్రోచే  సంపదల  కల్పవల్లీ .... 

వరలక్ష్మిగా వాసికెక్కె 

శ్రావణ రెండవ శుక్రవారం 

వరములనిచ్చి బ్రోచే 

వాసిగా చారుమతికి ....  

నగునూరి రాజన్న 

కరినగరము 

కలసి పోతున్నాను తేదీ : 21-08-2021

 కలసి పోతున్నాను

తేదీ : 21-08-2021

శీర్షిక :  ;ఇమిడి పోతున్నాను  

కవిత సంఖ్య : 154

కనులు మూసినా తెరిచినా 

అమ్మ నాన్నలు చదువే ముఖ్యమని 

ఎంతో మంత్రించినా ... తొమ్మిదిలో 

మొదలైన తెలంగాణ ఉద్యమ 

నీడలో.... ఇమడలేక ... చదవులకై  ... 

విద్యార్థుల్లో  కాట కలసి పోయాను ... 

పదకొండులో  పట్నమొచ్చి 

పైలా పఛీసులా తిరిగి తిరిగి 

పన్నెండు పరీక్షలవరకు 

వెండి తెరల జాడల్లో దండి 

దొరగా తిరిగేసి ...ఇమిడి పోలేక  

చదవలేక ... ఇరుక్కుపోయాను ... 

అలా అలలా  కదులుతున్న 

జీవన సంద్రపు యానంలో....

కఠిన శిలల వైఖరుల కలబోతలా .... 

ఉరుముల మెరుపుల ఉపకులపతి 

గారు మమ్మందరిని ఉరికించినారు... 

తిరిగి  తిరిగి మేమంతా మళ్ళీ 

విద్యా సంద్రములో కలిసి పోయాము ... 

నగునూరి రాజన్న 

కరినగరము 

వరలక్ష్మీ వ్రతం తేది: 20-08-2021

 వరలక్ష్మీ వ్రతం 

తేది: 20-08-2021

శీర్షిక : సకలైశ్వర్య సౌభాగ్య పూజ 

కవిత సంఖ్య : 733

సర్వ లోక స్త్రీల సంక్షేమకారకమై 

సర్వేశ్వరుడైన శంకరున్ని  .... 

పార్వతీ దేవీ ప్రాధేయపడి 

వ్రతమేదైనా ఆనతీయమని కోరగా ... 

వరలక్ష్మీ వ్రతమాచరించిన 

స్త్రీలకు సకల సౌభాగ్యములు 

కలుగ జేయునని ....సవివరముగా .... 

సన్నుతించి బోధించెను .... 

మగధరాజ్య కుండిన నగరంలో 

చారుమతి అనే  సద్గుణ సంపన్నురాలైన 

సాద్వీ మణి  సద్గుణములకు మెచ్చి 

తనంత తానై ప్రత్యక్షమాయె లక్ష్మీదేవి ..... 

శ్రావణమాసం  రెండవ శుక్రవారం 

నవ సూత్ర తోరగ్రంథి ధరించి 

వరలక్ష్మీ వ్రతము ... ఆచరించమని 

ఆదేశించె స్వప్నమున ..... 

స్వప్న వృతాంతమంతయూ 

సవివరముగా తెల్సిన పట్టణ 

స్త్రీలంతా కలిసి ఆ ప్రత్యేక 

శుక్రవారం వ్రతమాచరించి

అమ్మవారిని కొలిచిరి .... 

లక్ష్మీమ్ క్షీరసముద్ర రాజా తనయాం 

శ్రీరంగ ధామేశ్వరీం .... 

దాసీభూత సమస్త దేవ వనితాం ... 

లోకైక దీపాంకురాం .... అంటూ స్తుతించిరి ... 

సకల సౌభగ్యాలను 

సిరిసంపదలనొందెను .. 

నేటికీ..... హైందవ స్త్రీలంతా 

మనసా వాచా పాటించేది ... 

నగునూరి రాజన్న 

కరినగరము 

ప్రణయ గీతాలు తేది: 07-08-2021

 ప్రణయ గీతాలు 

తేది: 07-08-2021

శీర్షిక: ఊహల సుందరీ…. 

కవిత సంఖ్య: 722

చెలీ ఓహో…. నా… చెలీ 

మనసు ఊహల సుందరీ…. 

అల్లనల్లన కదిలె ఓ చల్లగాలి 

ఆనవాలు సెప్పవే నా చెలిది

అలిగి పోయిన నా చెలి

అడుగుజాడలు తెలిపి నీవు

ఆనతీయవే చక్కిలిగిలికి 

అంతరంగమున మధురముగా 

కొండ వాలున నిలిచిందా

కొంటె చూపులే విసిరిందా

కనులు… మూసినా…తన రూపమే

కంట…. నిలిచినే…ఆనందం…. //చెలీ//

మెరుపు తీగలా మెరిసిందా

మేని ముసుగులా నవ్విందా

రావా….….నను ….కరుణించి

రావా…. ….నను….వరియించి….. //చెలీ//

సన్నగ వీచే పైరగాలిలో

సంపెంగ ముచ్చట నీవైపోయి

భావన…. ఏదో… తెలపాలి

భారం…. నీవే….. కావాలి…. //చెలీ//

నగునూరి రాజన్న 

కరినగరము.  

కులుకు తేది :19-08-2021

 కులుకు

తేది :19-08-2021

శీర్షిక : మహాలక్ష్మి ... 

కవిత సంఖ్య : 153

క్షీరాబ్ది కన్నియట 

శ్రీమహాలక్ష్మియట 

కులుకులన్నీ కలబోసిన 

కలికి మహాలక్ష్మియట ..... 

అలకబూని అవతరించె 

భూలోకమున .... 

సన్నుతించి సమ్మతించె 

అలమేలు మంగగా ..... 

బంగారు పువ్వులో 

సింగారించుకున్న 

శ్రీ మహాలక్ష్మియే 

శ్రీవారి పట్టమహిషి ..... 

అన్నమయ్య కొనియాడే 

అన్ని నామముల ... నాడే 

అమృతవల్లీ ... ఆ తల్లిని  ... 

ఆదరించి కరుణించే 

తన భక్తులను .... నిత్యం ..... 

నగునూరి రాజన్న 

కరినగరము 

ఛాయా చిత్రం తేదీ : 19-08-2021 శీర్షిక : చారిత్రిక ఆనవాళ్లు

 ఛాయా చిత్రం

తేదీ : 19-08-2021

శీర్షిక : చారిత్రిక ఆనవాళ్లు 

కవిత సంఖ్య : 732

తరాల కింద తండ్లాడి నేర్చుకున్న 

హస్తకళ .... నాటి రోజుల్లో రాజులకో 

జమీందారీలకో...ఉన్నోళ్లకు మాత్రమే ....  

అందుబాటైన సరస్వతీ కళ .... 

తరతరాల జీవనయానం  మనిషిది

ఆనందాలు ... విషాదాలు ... ముల్లె 

గట్టుకుని ... మనసున మురిసిన ... 

ముసిరిన .... అడుగులకు నిడివి చిత్రం ... 

 

మరుపు మానవ సహజమనే ఉవాచకు 

తెర దించుతూ ... మానవ మేధకు 

మెరుగులు దిద్దుకున్న సాంకేతికతల 

సౌరభాలతో సంక్రమించుకున్న చిత్రకళ .... 

నలుపు తెలుపులో.. రంగు హంగులో 

కనుపాపలలో నిక్షిప్తం చేసుకునే బొమ్మ ....

మనస్సులో మనన నిమిషంలోనే 

మదిలో మెదిలే ఆకారపు ఆనవాళ్లు .... 

కలకాలం జ్ఞాపకం ఉంచుకునే రూపం 

ఆత్మీయతలకు ....  అనుబంధాలకు...  

అనురాగాలకు ... మిత్రబంధాలకు...  

అద్వితీయంగా అల్లుకున్న ఊసుల భావం .... 

గుడ్డ కప్పుకుని గుప్పుమన్న దగ్గర నుండి 

రక రకాల కెమెరాలెన్నో రాణించినా 

అన్నీ మాయమై ... అరచేతిలో ఇమిడిన 

చరవాణిలో సందు చేసుకున్నది ... ఈనాడు 

సెల్ఫీల మోజులో యువత బేజారు ...... 

నగునూరి రాజన్న 

కరినగరము 

ఉచితం చేదెవరికి. తేదీ : 08-06-2021 శీర్షిక : అనుచితమైతే వినాశనమే

 ఉచితం చేదెవరికి.

తేదీ : 08-06-2021

శీర్షిక :  అనుచితమైతే వినాశనమే

కవిత సంఖ్య : 682

ఒకటి కొంటె ఒకటి ఉచితమంటూ 

ఊదర గొట్టే ప్రకటనల జోరు 

వట్టి పోయిన బేరాలే  కావొచ్చు..... 

కానీ... ఓ పట్టు పడుతుంది 

జన సామాన్యుల నాడీని ..... 

పాలనలలో పండిన నేతలు కూడా 

సంక్షేమాల మేక తోళ్లకు 

సబ్సిడీల రంగులద్దుకుంటూ 

క్విడ్ ప్రో క్రో  లాంటి క్రీడలే 

శరణ్యం చేసుకుని ఐదేళ్లు అందలాల 

ఇంద్ర ధనస్సుల సాగరంలో

మునిగి తేలుతున్నారు  .... 

ఉచితం అనుచితమైతే 

లాలూచీల బేరసారాలే ... 

నీతి నియమాల ముచ్చటే  కాదు 

ఏకంగా మనిషి పతనానానికి 

మత్తుల  జిత్తులు కావొచ్చు .. 

ఉనికికే ఉరితాడై  మనిషిని...  

దేశాన్ని మసి చేయవచ్చు..... 

 

బేర సారాలలో ఉచితమన్నా ... 

పాలనలలో ఉచిత పథకాలన్నా 

మాటు వేసిన మతలబుల 

కాటు కనపడని వెనక  చేటు చేసే 

కాల నాగుల బాటే నన్న మాట.... 

అనామకుల పేర్లు వాడుకుని 

అసమదీయులకు వడ్డించే 

విందు భోజనాల విస్తర్లే అవి ..... 

జవాబుదారీ తనం లోపించిన 

జనసమూహాలలో ఉచితం 

అనుచితమైతే వినాశనమే ..... 

నగునూరి రాజన్న 

కరీనగరము 

ప్రేమ కావ్యం తేది : 21-07-2021 శీర్షిక : అన్నీ ప్రేమ కావ్యాలే ....

  ప్రేమ కావ్యం

తేది : 21-07-2021

శీర్షిక :  అన్నీ ప్రేమ కావ్యాలే .... 

కవిత సంఖ్య : 711

పెళ్ళికి ముందు ప్రేమ ఒక 

చిలిపి నవ్వుల కావ్యమైతే  

తదుపరంతా మధుర కావ్యమై 

మదిలో  నిలిచి పదిలపరుచు .... 

ఆచార సంప్రదాయాల గొడుగు నీడలో

అల్లుకున్న బందాలన్నీ ... బండెద్దుల్లా 

బతుకు బాటలో ఒడిదుడుకులను 

ఎదుర్కొంటూ ఎన్నెన్నో అడుగులేసి 

బాటసారుల్లా కలిసి సాగుతూనే ఉంటాయి ... 

కష్టాల కడలిలో కదిలిపోకుండా 

క్షణంలో తేరుకున్న గరికలా 

అనుభవాలను ప్రోది చేసుకుంటూ  

సుఖాల నెక్కిన సుక్కల పందిరి నీడలో 

ఆనందాలను పంచుకుంటుంటారు  ..... 

గొప్పోళ్ళ గోత్రాలకు మాత్రమే 

గొడుగులు పట్టే గతాల నీడలు 

అడుగడుగున కదిలిపోయే 

జనసామాన్యుల లెక్కలకు ఒక్క 

పేజీ కూడా కేటాయించదు ..... 

ఆనవాళ్ల వివరాలు అందరికి 

అందుబాటుండక పోయినా... 

లెక్క లేనంత మంది జీవితాలలో 

జరిగేవన్నీ అపురూప ప్రేమ కావ్యాలే..... 

నగునూరి రాజన్న 

కరినగరము  

చిత్ర కవిత - on the desire of sri M Rajeswara Rao

 చిత్ర కవిత 

స్థల మహిమో ... స్థాన మహిమో.... 

శాపమో .... శకునమో ..... 

పూర్వ జన్మ సుకృతమో .... 

పుణ్యాల తృణీకరణ తత్వమో ..... 

యుగాల నాటి  మాట .... 

గాంధారి పుట్టిన ప్రాంతం 

సాద్వీమణి  ద్రౌపదిని 

వివస్త్రను  చేసిన ఆనవాళ్లు ....

గీతాచార్యుడు ఆదుకున్న వైనం ....  నాడు 

అమ్మ చెల్లి  భార్య  కూతురు

అన్నీ అనుభవిస్తూనే  ఎదిగిన తరం 

ఆడదంటే అర్ధభాగం అని చెప్పినా 

ఆలకించని మొండి తనం. .... నేడు 

విశ్వంలో  మానవ డి ఎన్  ఏ 

అవశేషాలలాగే .... రాక్షస మూకల 

శేష భాగమో ..... దేవుని పేరు చెప్పి 

దెబ్బ తీస్తున్నారు .. టక టక కాల్చేస్తూ .... 

విజ్ఞుల మౌనం విశ్వానికే చేటు .... 

వింత ప్రవర్తనల నరరూప రాక్షసులు.... 

వందకు  రెండొందలకే అమ్మేస్తూ 

అమ్మ తనాన్ని అపహాస్యం చేస్తున్నారు. 

అంతట తానుండలేకనే  కద

ఆవరించె  అమ్మ లాగ ..... దైవం

ఆక్రోషించే  అమ్మ మనసు  శాపం.... 

అవదా..... మానవాళికి తీరని  మచ్చ .....

గీత బోధనలు చదివిన తరం 

రాత మార్చడంలో చూపదా చొరవ 

రావడం ఆలస్యమేమో కానీ 

రాకుండా మాత్రం ఉండడు 

దైవం మానుష రూపేణ ..... 

నగునూరి రాజన్న 

కరినగరము 

పదాల కవిత తేదీ : 17-08-2021 శీర్షిక : ఉదయతపూర్వపు సంధ్య

 తూర్పు , గాలి, ఆమని , సంధ్య , 

వయ్యారం , వేకువ .... 

అంశం: పదాల కవిత 

తేదీ : 17-08-2021

శీర్షిక : ఉదయతపూర్వపు సంధ్య 

కవిత సంఖ్య : 153

వర్షఋతువేతెంచి....  శ్రావణ 

మేఘాలతో కమ్ముకున్న చీకట్ల 

తలుపులు తెరుచుకుని తూర్పు 

దిక్కున తొంగి చూడబోయే భానుని 

కొరకై .... 

తరువులనావరించిన ఆమని 

పైర గాలి వయ్యారాలు పోతుంటే....   

శుక పికములు ఆలపించే భూపాల 

రాగములు ఆనందాల ఆహ్వానాలు 

పంపు ..... 

వేకువనే గగనంలో విచ్చుకున్న  

కెంజాయ వర్ణం మిళితమైన మేఘాలేమో  

వరుణుని ఆజ్ఞకై వేచి చూస్తున్న 

జలతారు కన్యల్లా గోచరించ ..... 

తొలకరి వానల పలకరింపులతో 

పచ్చ కొక చుట్టుకున్న అవని మాత 

పసక పరిమళాలను వెదజల్లుతూ 

ఉదయాతఁపూర్వపు  సంధ్య కాంతులకై   

దినకరునికై ఆహ్వానములనే పంపింది ..... 

నగునూరి రాజన్న 

కరినగరము 

స్వప్న కుసుమాలు తేది : 17-08-2021 శీర్షిక : జారుకుంటున్న కుసుమాలే…

 స్వప్న కుసుమాలు

తేది : 17-08-2021

శీర్షిక : జారుకుంటున్న కుసుమాలే….. 

కవిత సంఖ్య : 731 

నిశీధి మధ్యలో నింగిన  చుక్కలా 

అర్దరాత్రి స్వాతంత్య్రం వచ్చినందుకో 

ఏమో ..... 

మగత నిద్రలోని  కలలన్నీ 

మరు రోజు ఉదయాత్పూర్వానికే 

జారుకుంటున్న కుసుమాలే ..... 

కోట్ల మంది తపస్సులు చేసి 

లక్షల మంది తమ తనువులర్పిస్తే 

వేల మందికి గుర్తింపొచ్చినా 

కొంతమందికే పట్టం కట్టారు ...... 

బీజం అక్కడే పడిందేమో ...... 

రాను రాను రాజుగారి గుర్రం ... లా 

ప్రాయోజితాలకే పరువులు కుదువ 

పెట్టుకుంటూ ... పూటకో రంగు చొక్కా 

మారుస్తూ....విలువల వలువలు జారవిడుస్తూ 

ముందు తరం భావి నాయకులైన 

అనుచరగణాలకు ఏమి సూచనలిస్తున్నట్టు ..... 

పవిత్ర ప్రజానాయకులమన్న స్పృహలు 

కోల్పోతున్న  కొంత మంది పాలకులు 

ప్రజలింకా నిరక్షరాస్యత నీడలలో 

మగ్గుతున్నారన్న భ్రమలలో బతికేస్తున్నారు .... 

ఉమ్మడి ఆస్తులను ఉపాహారాలలా 

ఊడ్చి పెడుతూ తమ వందిమాగదులకు  

నిస్సిగ్గుల నిజస్వరూపాలను తమంత 

తామే బహిర్గత కారకులౌతున్నారు .....  

కడు చిన్న ఉపాధికైనా కనీస 

విద్యార్హతలు విధించుకున్న మనమే 

కక్ష గట్టినట్టు  లక్షలు కుమ్మరించి ...  

సంక్షేమాల చిరునామాల  ముద్రలేసినంత 

మాత్రాన .... మాయమౌతుందా  ఆర్ధిక 

అంతరం ...... 

స్వార్థాలను సాథ్ లగేజీలా కాకుండా 

ఇగురంగా ఇరుగు పొరుగు క్షేమాలను  

సమతూకం చేయగల సత్తా సమకూర్చి 

సంపన్నం చేయడమే సరయిన పద్ధతి .... 

నగునూరి రాజన్న 

కరినగరము 

ముస్తాబుల పల్లకీ తేది : 16-08-2021 శీర్షిక : స్వతంత్య్ర భారతం ....

 ముస్తాబుల పల్లకీ

తేది : 16-08-2021

శీర్షిక : స్వతంత్య్ర భారతం .... 

కవిత సంఖ్య : 152

వలసవాదుల కఠిన  దాస్య 

శృంఖలాలను... వరస పెట్టి 

ఎదిరించి అలుపెరుగక పోరాడిన 

స్వాతంత్య్ర పోరాట అమర వీరులకు .....

ఆత్మీయ నమస్కారం  

వందలేండ్ల  పోరాటములు   ...

వేల మంది బలిదానాలు .... 

బలిపీఠాలను ముద్దాడిన 

భగత్ సింగ్ లాంటి వారు .... 

ఎందరెందరో కలిస్తినే ....ఎరుకగా 

మన స్వతంత్య్ర భారతమ్మను 

సన్నుతంగ సవరించి అధిరోహింప 

చేసిరి  .... ముస్తాబుల పల్లకీలో ..... 

కోరుకున్న ప్రజా స్వాతంత్య్రం 

కొంతమంది చేతుల్లోనే .... 

కొలిమి లోని కర్రులా కాలి                    

కోరి ప్రజలకు వాతలు పెడుతుంటే ...... 

సంబర పడుతుందా... బాపూజీ గుండె ...  

సంతసిస్తుందా... సుభాష్ మనసు

పరవశిస్తుందా .... పటేలు హృదయం ... 

ఓలలాడుతుందా  ... అల్లూరి శ్వాస 

తీరుతుందా .... తిలక్  గారి అలక .... 

ఓ మనిషి ఆలోచించు 

ఓటు వేసే ప్రతీసారి 

ఎందరో మహానుభావులు 

అందరికీ వందనాలు ..... 

నగునూరి రాజన్న 

కరినగరము 

త్ర కవిత 21 తేదీ : 16-08-2021' శీర్షిక : ఎర్ర బస్సు కర్చీఫ్ లు ...(politician paying namaskar, money in one hand and voting with other hand, speech giving, roaring in mike, in the centre chair.....

 చిత్ర కవిత 21 

తేదీ : 16-08-2021'

శీర్షిక : ఎర్ర బస్సు కర్చీఫ్ లు .... 

కవిత సంఖ్య : 730

ప్రజల ద్వారా ప్రజలకోసం 

ప్రజల ప్రభుత్వమంటూనే 

ప్రయాణం మొదలెట్టిన 

ప్రజాస్వామ్య పాలనలు  .... 

పరిహాసాల చిరునామాలే…. 

చాలామంది ధవళ వస్త్రాల పాలక దూతలు 

అతి వినయాలను అవపోషణ పట్టి…

కల్లబొల్లి కపట వినయాలను కరతామలకంగా 

పాటించే ఘనాపాటీల ఉద్దండులే…

గొప్పోళ్ళ గోత్రాలన్నీ  ఉటంకిస్తూ 

పుటం పెట్టిన బంగారమోలే 

మాటల మైకులను చెవుల్లో రొదలు 

చేయిస్తూ….సభలు ...సమావేశాలు…

రోడ్ షోలు సర్వసాధారణం  .... 

లంచగొండి ఉద్యోగుల భరతం 

పడతామంటూనే...  ప్రగల్భాలు పలికే

నాయకులంత… పరిహాసాల చిట్టాలే… 

గురువింద గింజలా ... తమను 

తామే మరిచిపోయినట్టు నటిస్తూ  .... 

నోట్లిచ్చి  ఓట్లు కొనుక్కునే ....దళారీ 

వ్యవస్థలకు తెరలు తీస్తారు...కాదంటే....  

కుల మతాల ప్రాతిపదికలో ...

ప్రాంతీయ చిచ్చుల పాచికలో 

పనికి రాని పసలేని ఉచిత పథకాలో

తెర మీద బొమ్మలై ఆడుతాయి .... 

పానకాల స్వాములకు అభిషేకాలు .... 

స్వార్థపూరిత సన్నిహితులతో 

పచ్చనోట్ల కుచ్చు టోపీలు .... నిత్య 

సత్య వ్రతాలై నోచుకుంటాయి .... 

సాంకేతికతలతో ఈవీఎంలొచ్చినా 

సడేమియాల్లాంటి రిగ్గింగులు ... 

మొత్తానికి కుర్చీ లాటలో .....ఇంకా 

ఎర్ర బస్సులో కర్చీఫ్ ల చందమే….. 

అవినీతి ఓటు ముందా .... 

ఆ ఓటుతో గెలిచిన నాయకుని 

దుర్నీతి  పాలన ముందా .....  అంటే 

అవినీతి ఓటే ముందంటా....నేను ...   

కలసికట్టుగ ఓటర్లంతా నీతి పాటిస్తే

కొట్టుక పోదా గంగలో అవినీతి అంతటా… 

నగునూరి రాజన్న 

కరినగరము 

మేఘం నీవైతే ... తేది : 16-08-2021 శీర్షిక : నీ తోడే నా దారి ....

 మేఘం నీవైతే ...

తేది : 16-08-2021

శీర్షిక : నీ తోడే నా దారి .... 

కవిత సంఖ్య : 30+7

పుష్కలావరపు  మేఘం నీవైతే 

పుణికి పుచ్చుకునే  పైరగాలిని నేనౌతా 

కురిపించి తొలకరిని...

చిరునవ్వుల  చిరునామా అవుదాం .... 

మధు మేఘం నీవైతే 

సుధలు కురిపించే రాగం నేనౌతా 

హరివిల్లుల ఛాయలలో 

విరిజల్లులు కురిపిద్దాం ..... 

అవని మాతను అభిషేకించి 

హాలికులను సంతసింపజేసి 

అంకురాలను పలకరించి 

సస్యశ్యామలాలకు ఊతమిద్దాం .... 

అల్లన వీచే పిల్లగాలిని నేనై 

కొండా కోనలు దాటుకుని 

మెండుగా పాడి పంటలకై 

నీ వెంట పదం కలుపుతాను ..... 

నీలి మేఘం నీవైతే 

వన విహారిని నేనౌతా .... 

అందాల ప్రకృతిలో 

సుందరాలు తిలకిద్దాం .... 

నగునూరి రాజన్న 

కరినగరము 

చిత్ర కవిత ( ఆవు ) తేది : 13-08-2021 శీర్షిక : కరుణా మూర్తి. .....

 చిత్ర కవిత ( ఆవు ) 

తేది : 13-08-2021

శీర్షిక : కరుణా మూర్తి. ..... 

కవిత సంఖ్య : 30+6

వేల సంవత్సరాలనాడే  వేనోళ్ళ 

పొగడబడి వేదాలలో పొందుపరిచె .... 

వెన్న దొంగ కన్నయ్య మన కృష్ణయ్య 

సేవించుకుని మురిసె ముచ్చటగా ..... 

సకల దేవతలకు ప్రతినిధియై 

చరాచర విశ్వాన్ని తనలో 

ఇముడ్చుకున్న సర్వసంపదల

పవిత్ర సన్నిధానం మన గోమాత.... 

యుగాల క్రితమే  జగాన మనము 

అపర మాతగా గుర్తించి ఆధ్యాత్మికత  

ప్రాధాన్యత జోడించి పవిత్రంగా 

పూజించిన సంస్కృతి సంప్రదాయం .... 

వ్యవసాయాధారిత దేశానికి 

వంశ పారంపర్యంగా సేవలు 

చేస్తూ అడుగడుగున రైతన్నకు 

అందండలు అందిస్తూ అన్నపూర్ణగా 

తీర్చి దిద్దినది ..... 

పిల్లలకు తల్లిలా పాలు అందజేసి 

ఎవుసం పనులకై  రైతులకు తన 

పిల్లలనందజేసి... పంచకంలో 

ఔషధాలను అందిస్తూ అహర్నిశలు 

మానవాళిని కనిపెట్టుకున్న కరుణా మూర్తి. ..... 

నగునూరి రాజన్న 

కరినగరము 

మన జండా తేది: 15-08-2021 శీర్షిక: మువ్వన్నెల మన జండా

 మన జండా 

తేది: 15-08-2021

శీర్షిక: మువ్వన్నెల మన జండా 

కవిత సంఖ్య : 739. 

మువ్వన్నెల మన జండా 

మురిపించును ఎదనిండా .... 

ఆగష్టు పదిహేనున మన 

ఆనందాల స్వాతంత్ర్యం 

అమరవీరుని  జ్ఞాపకాల

అమృత వజ్రోత్సవం  …. //మువ్వ//

ఆమనిలా వచ్చే చూడు 

అజేయమైన మన జండా

సద్భావన సందళ్ళతో 

సమున్నతమే నిండుగా ....  //మువ్వ//

త్రివర్ణాల శోభితమై

తిప్పలనే బాపింది 

పిల్లలకు పెద్దలకు 

సంబరాలు తెచ్చింది         //మువ్వ//

పింగళి వెంకన్న మంత్రం 

ఫిరంగిలా నిలిచిన యంత్రం 

కాషాయం పౌరుషమై

కలబడు మన సైనికుడు …  //మువ్వ//

పాలతెలుపు శాంతికి 

ప్రపంచ కపోత  చిహ్నం 

ఆకుపచ్చ నిలిచింది 

హాలికునికి ఆయుధమై ....  //మువ్వ//

అశోకుని ధర్మ చక్రం 

ఆక్రమించె  మధ్యలోన 

సంఘం శరణం గచ్చామంటుూ

సమ సమాజ సూత్రంగా .....    //మువ్వ//

సరిహద్దున జవానుకు 

పురివేయును ప్రాణవాయువై 

పొరుగు ధూర్తుల శిక్షించి

మనహద్దులు రక్షించ....    //మువ్వ//

వందే మాతరమంటూ  

వరస కలుపె గొంతులు 

జన గణ మని పాడెనే  

జగతిన భారతీయులు.   //మువ్వ//

నరనరాన దేశభక్తి 

నగారా మోగించగ

ప్రతి వారి గుండెనిండ

పండగై నిలిచింది.....      //మువ్వ//

నగునూరి రాజన్న

కరినగరము. 

భావ గీతం తేది : 14-08-2021 శీర్షిక : ప్రకృతే పరమోన్నతం

 భావ గీతం 

తేది : 14-08-2021

శీర్షిక : ప్రకృతే పరమోన్నతం 

కవిత సంఖ్య : 728

పదే పదే నిరూపితమే

ప్రకృతి మాతె ఎపుడు 

పరమోన్నతమంటూ ..... 

తొలకరితో చినుకులను  

అవని పైన చిలకరించ... 

ఆశపడిన  హాలికుడు 

అప్పుజేసే పంటలకై .... //పదే పదే //

అదను చూసి మబ్బులేమో 

చాటేసే తమ ముఖము 

విత్తిన విత్తనాలన్నీ ... 

ఎదురుచూసి ఎత్తిపోయే    //పదే పదే //

ఆశపడిన రైతు మోము  

దీనంగా దిగులు పడే   

చేసిన అప్పులేమో 

తప్పని బాకీగ నిలిచే    //పదే పదే //

కలుషితాల ఫలితమో 

కాలుష్యపు కోరలో 

కలికాలపు ఋతువులన్ని  

కాట గలిసి మాట మార్చె //పదే పదే //

ఓ మనిషీ మేలుకో 

నీ తప్పును దిద్దుకో 

పవిత్రంగ భావించు  

ప్రకృతిని పూజించు  //పదే పదే //

 

నగునూరి రాజన్న 

కరినగరము 

చిత్ర కవిత తేది: 21-05-2021 శీర్షిక: చేతులు కాలాక ఆకులా ...? ( a man observing for the plant to grow planted in his back )

 చిత్ర కవిత 

తేది: 21-05-2021

శీర్షిక: చేతులు కాలాక ఆకులా ...? 

కవిత సంఖ్య: 26

గాలి మబ్బుల గగనములో 

మనసు వెనక నాటుకున్న 

మోడువారిన కర్ర నీడన 

నీలి మేఘాల నీడలు గాంచి

నిరీక్షణలా వాన నీటికై .... 

పచ్చని చెట్లన్ని పడదోసి 

రక్షణ లేని జీవిత వెలుగులో

కందీల గుడ్డి  కాంతులలో  

కాకమ్మకు కబుర్లు చెప్పుచూ 

రంగుల కలలే కంటున్నావా .... 

మరువలేని మానవ తప్పిదంగ 

చిలిపి చేష్టల శిశిరాలకు ఆకులు

రాల్చుకున్న  తరువు శిరోమణికి 

ఆశల దీపం వెలిగించి ఆమని 

వసంతాలకై అర్రులు చాపావా  .... 

చేతులు కాలాక ఆకులు పట్టుకోవడం

ఇకనైనా మానుకో సోదరా ...

చెట్లే మనకు ప్రాణ మిత్రులని 

ప్రాణవాయువులకు పట్టుగొమ్మలని 

పంచ భూతాలలో ప్రథమమని 

పదులలో నాటి నీవు.. ఉదహరించుకో ... 

నగునూరి రాజన్న

కరినగరము 

గరుడ పంచమి తేది : 13-08-2021 శీర్షిక : అమృత మూర్తి

 గరుడ పంచమి 

తేది : 13-08-2021

శీర్షిక : అమృత మూర్తి 

కవిత సంఖ్య : 151

సనాతన సాంప్రదాయాలో 

సంస్కృతి వారసత్వాలో 

ఆచార వ్యవహారాల బలమో 

చెట్టుకూ ... పుట్టకూ మొక్కడమే 

ఘనమైన మన హైందవం ..... 

లక్షల ఏండ్లనాడే లక్షణంగా 

అక్షరీకరించారు ఆర్యులు 

మన వేదాలలో ... పురాణాలలో ... 

ఇతిహాసాలలో ... అనుభవాలను.... 

గౌరీపూజలు ఘనముగ చేసి 

సంతానార్ధులంతా సాగిలపడి 

మొక్కెదరు నాగ దేవతలకు ... 

వినత సంతానమై ఉద్భవించిన 

విఖ్యాతుడు గరుడుడు పుట్టిన రోజే 

గరుడ పంచమిగా ప్రసిద్ధికెక్కె .... 

ఇంద్రున్నెదిరించి అమృతం 

సాధించి అమ్మను రక్షించిన 

అమోఘమైన అమృత మూర్తి 

గరుత్మంతుడు... 

 

అంతటి  పరాక్రమవంతులు 

ఆత్మీయతలు కలిగిన అమృత మూర్తి 

సలక్షణమైన  సంతానాలకై 

అర్చించెదరు ఈ పంచమి రోజున ... 

నగునూరి రాజన్న 

కరినగరము 

నాగ పంచమి తేదీ : 03-08-2021 శీర్షిక : సంతాన దేవత ...

 నాగ పంచమి

తేదీ : 03-08-2021

శీర్షిక : సంతాన దేవత ... 

కవిత సంఖ్య : 727

వేదాలు మర్మంగా ఘోషించినా 

పురాణాలు విపులంగా  ప్రవచించినా 

ఇతిహాసాలు వివరంగా ఎరుకపరిచినా 

పంచభూతాలను పట్టినా ముట్టినా 

ప్రపంచానికే మార్గదర్శనమౌతున్న 

ఘనమైన మన హైందవాన  పబ్బతే సుమా .... 

చెట్టు పుట్ట కొండా కోనా నది 

సముద్రము .... ఆవు కుక్క మేక 

మొదలైన పశు పక్ష్యాదులు 

అలాగే విషతుల్యమైన నాగు పాములలో  

దైవాన్ని దర్శిస్తాం... కావున పూజనీయమే ....... 

అనంత శయనునికి ఆదిశేషువే  

పానుపవ్వగా... బోళాశంకరునికి 

మేడలో ఆభరణమై .... వినాయకునికేమో 

యజ్ఞోపవీతమై .... మొత్తంగా 

సుబ్రహ్మణ్యునికి ప్రతిరూపమై  

సంతాన దేవతగా సర్వత్రా 

పూజలందుకొనుచుండె.....  

రైతన్నలకు రక్షలనివ్వాలని 

పాడి పంటలకు అండదండవ్వాలని 

చేను చిలక తిరిగే వ్యవసాయదారుల 

రక్షించాలని .... మహిళలంతా కూడి 

మహిమాన్వితమైన నాగేంద్రునికి 

నాగపంచమికి ... నాగుల చవితికి 

పుట్టల వద్ద పూజలు చేసి వేడుకొందురు .....  

నగునూరి రాజన్న 

కరినగరము 

లక్ష్యం తేది : 12-08-2021 శీర్షిక : గమ్యం

 లక్ష్యం 

తేది : 12-08-2021

శీర్షిక : గమ్యం 

కవిత సంఖ్య : 150

వద్దే వద్దు గమ్యం లేని  పయనం 

ప్రతి ప్రాణికి ఉంటుందొక గమ్యం 

చిట్టి చీమకు సైతం ఉందొక గట్టి లక్ష్యం   ... 

కాలం మారినా కడుపు నింపుకునే ఆశయం... 

విజ్ఞానవంతులమని విర్రవీగే మనకు 

వివేకం వివేచనలే తోడు ఆయుధం ... 

వినమ్రంగా తొంగి చూస్తే చిక్కుట ఖాయం.... 

విజయ తీరాలను చేరుట తథ్యం...  

అత్యవసరాలు , అవసరాల బేరీజులతో  

ఆనక కోరుకునే సంతోషాల  అంతరాలలా 

అన్నీ కలగలపక ఆలోచిస్తే తప్పక 

అంతు పట్టదా తక్షణ కర్తవ్యం..... 

పట్టింపులు  లేని పాలకుల లాగా 

ఎట్టి చాకిరీల ఎత్తిపోతల లాగా 

భయం లేని బడా అధికారుల్లాగా  

భక్తి  లేని  బంటుల్లాగా  వద్దే వద్దు.... 

శ్రద్ధ  లేని శ్రాద్ధం భూమికి భారం.... 

  

కర్మ భూమి మన దేశం నమోనమామి 

కదలాలి గమ్యమెఱిగి మనమంతా  క్రమశిక్షణల

కదం కలిపి బహుదూరపు బాటసారిగా... ఇక 

కనకమై మెరవదా మన దేశ భవిత!

నగునూరి రాజన్న 

కరినగరము