చిత్ర కవిత.
కాడెద్దుల ఘనపు కారులోన
కల్మషమెరుగని చిరునగవులు..
కాలుష్య భూతపు నీడలు వదలని
కారండోయి కమ్మని పయనం .....
జోడు గిత్తల కోడె లయలు
ఊయలూగే మధురోహలు
ఉన్నఫలంగా సాదా మనిషికి
ఉన్నతంగ కారెక్కిన సంబరాలు .....
పాత కొత్తల మేళవింపుల
పసందైన రవాణా సాధనం
కాణీ ఖర్చులేని ఇంధనం
ఉన్నదానిలోనే పొందే ఆనందం...
పన్ను పోటు అధికారుల పైత్యాలు
అనుమతుల జాబితాల అక్కరలు
మధ్యవర్తుల జోరు బడాయిలు
ప్రమాద భీమాల భరోసా ముచ్చట్లు
జరిమానాల చిక్కు జంజాటములు
మచ్చుకైనా అక్కరలేని మొక్కుబడి ....
మేధో మదనపు మెరుగు దిద్దులు
జీవిత సత్యపు నడకల నీడలు
పల్లె పట్నపు కలబోతల పరుగులు
కల్లా కపటమెరుగని కానుకల మడతలు ....
నగునూరి రాజన్న
కరినగరము.
No comments:
Post a Comment