కాలం మార్పు.
తేది: 14-04-2021
శీర్షిక: స్థితప్రజ్ఞతదాయినే....
కవిత సంఖ్య: 107
పరిభ్రమణాల భూగ్రహానికి
ప్రతిదినం కదలని దినకరుడు
కదులుతున్నట్టుగా భ్రమింప
చేసిన చందంగా కాలమెప్పుడు
మార్పు చెందని స్థితప్రజ్ఞతదాయినే ...
పెద్ద తరం చిన్న తరం మధ్య
పొడసూపే మార్పుల చక్రమే
కాలమార్పుల్లా భ్రమలు కల్పిస్తాయి ...
గతి తప్పని ఋతువులతో
తరమేదయినా బతుకునివ్వడమే
కాలానికి తెలిసిన నిర్వచనం ....
వసంతాల చిగురించినా
గ్రీష్మ భీష్మాలను చిట్లించినా
శిశిరాల తలలు వాల్చినా
హేమంతాల గిలిగింతలయినా
మర్మమెరుగనీయక మనలను
తన అధీనములో తిప్పుకుంటుంది ...
కష్టసుఖాల కలబోతలు
జయాపజయాల విశేషాలు
లాభనష్టాల సంప్రాప్తతలు... అన్నీ
ప్రకృతి పట్ల మానవుడు చూపే
ఆచరణల అడుగుజాడలే ....
మనమనుకుంటున్నట్టుగా
కాలమార్పుల కథా కమామీషులు కాదు ....
నగునూరి రాజన్న
కరినగరము.
No comments:
Post a Comment