దీపావళి గేయం.
తేది- 11-11-2023
శీర్షిక - వెలిగించుము దీపాలు.
వెలిగించుము దీపాలు .
విజ్ఞాన జ్యోతులుగా…
తొలిగించుము చీకట్లను
అజ్ఞానపు బాటలలో…
మదులనిండా ఆనందం
మరు మల్లెల శోభితమే…
మురిపములే మానసమున
ముత్యమైన కాంతిదీపం…
కృతములోన జన్మించెను
అసురుడు ఆ నరకుడు …
అసురసంధ్య వేళలలో
అవనిమాత వరాహులకు …
వెలిగించుము దీపాలు .
విజ్ఞాన జ్యోతులుగా…
కఠిన తపోసంపత్తుల
కుటిల వరముల పొంది
కన్నుమిన్ను కానకుండా
కంటకుడై ప్రవర్తించే ...
ముసురుకున్న బాధలతో
ముల్లోకములు వణకగా ...
మునులు గంధర్వులు
ముందు నిలిచే శ్రీహరికి…
వెలిగించుము దీపాలు .
విజ్ఞాన జ్యోతులుగా…
అమ్మచేత మరణమని
వరము కోరే నరకుడు ...
ఆకోరికనే తీర్చగా
అవతరించె హరియే కృష్ణుడిగా …
ఘోరమైన యుద్దంలో
సన్నద్దం ప్రదర్శించి ..
సంహరించె నరకుడిని
సత్యభామ తోడునిలువ…
వెలిగించుము దీపాలు .
విజ్ఞాన జ్యోతులుగా… .
తగరాని గుణములతో
తనయుడైన సహించక …
సంహరించె సదాచారం
బోధించగ పాలకులకు …
పునీతమై పాటించిన..
అదేకదా అసలుసిసలు
ఆనందాల దీపావళి…
వెలిగించుము దీపాలు .
విజ్ఞాన జ్యోతులుగా…
అవనిపైన ఇంటింటా
ఆనందం పెల్లుబుకగా
వెలిగించిరి దీపాలను
వరుసబెట్టి తోరణముగా…
దీపంజ్యోతి పరబ్రహ్మం
దీపేనా హరదే పాపం…
దీపంజ్యోతి కలిగిన ఇంట
దాపున శ్రీలక్ష్మీ సంపదలిచ్చున్….
వెలిగించుము దీపాలు .
విజ్ఞాన జ్యోతులుగా…
తొలిగించుము చీకట్లను
అజ్ఞానపు బాటలలో…
నగునూరి రాజన్న
No comments:
Post a Comment