అవును అమ్మే గుర్తుకొస్తోంది ..
తేది : 01-02-12024
శీర్షిక : మధుర క్షణాలు
అనుక్షణం తన్మయత్వం చెందిన
అమ్మ అనురాగాల అనునయాల స్పర్శ...
పని వేళలలో పరాకుతో కోప్పడినా
ప్రేమపూర్వకమైన పెన్నిధి తనం ...
అబ్బా ! దెబ్బలాడుకోకండర్రా
అని పిల్లలను అన్నప్పుడల్లా
బాల్యములో అమ్మ బతిమాలి
చెప్పిన విషయమేనని ....
బాగా చదవాలంటూ పిల్లలకు
బోధింస్తుంటే.... నిరక్షరాస్యత
నిగ్గదీసుకున్నా .. అనుభవాల
ఆకళింపులతో ...మమ్మల్ని
ఉన్నతంగా చూడాలన్న నీ ఆకాంక్ష ...
అడుగడుగున ప్రపంచాన్ని చూస్తుంటే....
కలిగినదానిలో కలో గంజో ...
ప్రాణం నిలుపుకోను పచ్చడి మెతుకులో ...
అన్న మీ ఆర్ద్రత మాటల అనుపానుల
ముచ్చట్లు....
బడినుండి వడి వడిగా వచ్చి
నీ ఒడి చేరిన క్షణం నుండి....
పైచదువులకు పల్లె వీడినా ...
ఉద్యోగాలకు ఊరు విడిచినా
మళ్ళెప్పుడొస్తావంటూ కంటనీరు
పెట్టుకున్న తీయని జ్ఞాపకాలు....
పదే పదే మననమయి... కలలై
కలవరింతలై ...పలవరింతలై...
వెన్నంటే ఉన్నాయి ప్రతి రోజు...
ప్రతీ క్షణం ... నేటికీ ... ఏనాటికి ...
నగునూరి రాజన్న
No comments:
Post a Comment