చిత్ర కవిత తేది 11-09-2023 శీర్షిక : చిరు కాంతిపుంజం.

 చిత్ర కవిత 

తేది 11-09-2023 

శీర్షిక : చిరు కాంతిపుంజం. 

సహస్రాధికం.  

చిమ్మచీకట్లను చీల్చుకొని వచ్చే 

చిరు కాంతిపుంజపు వెలుగు గుచ్చం… 

అజ్ఞాన తిమిరాలను తరిమే 

అజేయ పాశుపతాస్త్రం ..

 

అక్షరమును చూసి మురిసిన 

ఆ మోము అజేయమై నిలుచు.. 

అనుభవాల ఉదాహరణలైన

ఆణిముత్యాలు అనేకమేకదా ....

పొత్తము చేత పొదువుకున్న 

బాల్యం…పొందుగ చేకూరును 

నిక్కమైన బంగారు భవితవ్యం

నిజమిక నమ్మి తీరవలయును…

కనులలో వెలుగుతున్న కాంతి రేఖలు

కానరావెందులకో కరుకు పాలకులకు.. 

పదాదికారులకు… చేతులిరువైపుల

జ్యోతికి ఉంచి చేయూతనివ్వరేలనో….

లెక్కలేని వసంతాలెన్నో గడిచినా

పక్కాగా వజ్రోత్సవ వాకిట నిలిచినా

పాలకులకు పట్టని ఎట్టిబతుకులే

మట్టి బతుకులౌతున్న రేపటిపౌరుల

నేటి బాల్యం … 

ఊరంతా ఉచితాలు పంచుతూనే

 ఉపాయవంతులైన నాయకులు మాత్రం… 

 ఉచిత విద్యలు అమలుచేయమంటే 

 ఉడతా భక్తిని కూడా ప్రదర్శించరు..

నగునూరి రాజన్న