నేనెరిగిన గొప్ప ఉపాధ్యాయులు తేది : 05-09-23 శీర్షిక : మా మంచి తిరుపతిరావుగారు.

 నేనెరిగిన గొప్ప ఉపాధ్యాయులు

తేది : 05-09-23 

శీర్షిక : మా మంచి తిరుపతిరావుగారు.  

అడుగడుగున జీవితమంతా

పాఠాలను బోధించే అనుభవాల

సారాలన్నీ పాఠ్యాంశములే

అనునిత్యం మనందరికీ పాఠశాలనే… 

బలాదూరు బాల్యంలో వర్ణమాల 

నేర్పించిన గురువు... అల్లిబిల్లి తుళ్ళింతల 

సమయంలో క్రమశిక్షణలంటూ కొంత 

కటువుదనాలతో కట్టడి చేసిన గురువులు. 

బతుకు బాటలో బడి పోషించే 

భవ్యమైన పెద్దన్నపాత్ర..ప్రత్యక్షం పరోక్షం

చేతిరాతల చెంగల్వ పూదండకు 

మంచి నడవడికల మల్లె పరిమళాలు ..

ఏది ఏమైనా ఎనిమిది తొమ్మిదిలో 

ఎరుకపరిచే మా తెలుగు మాష్టారు 

స్వర్గీయ శ్రీ తిరుపతిరావు గారు…

పద్యమును నిబద్దమైన రాగయుక్త 

గానమెత్తుకున్న  రసరమ్యతల మధురమో... 

ఇంటికిచ్చిన పని చేయకున్నా … 

కంఠస్థముతో పద్యం ఒప్పజెప్పకున్నా… 

తిట్టక కొట్టక నల్ల బురఖా ధరించమని 

తెలిపిన వింత సూచనేమో … 

మనమున విత్తనమై నిలిచి 

మంచి గంధపు మొక్కగా పరిణమించి 

పరిమళాలను పరివ్యాప్తింపజేసి నేడది 

ఫలప్రసాదమైన దేమో...నేనిలా 

సాహితీక్షేత్రములో తచ్చాడుటకు… 

పూర్వ బంధమేమి లేకున్నా 

పుణ్యమయే భూరి పరిమళాలను 

పుష్కలంగా వ్యాపింపజేస్తూ వ్యక్తికి దేశ

పురోభివృద్ధికి పునాదిరాయవుతాడు...

నగునూరి రాజన్న