కుదిరితే ఓ కప్పు కాఫీ తేది : 29-10-2021 శీర్షిక : తేనీటి విందులు

 కుదిరితే ఓ కప్పు కాఫీ 

తేది : 29-10-2021

శీర్షిక : తేనీటి విందులు 

కవిత సంఖ్య : 785 +1 

ఆవు పాలు తాగేటోని  ఆలోచనా శక్తిని 

తట్టుకోవడం కష్టమని ... నాటకమాడిన 

కపటబాజి తెల్లోడి మాయలో పడ్డ ఎలుకలం .... 

తెల్లారితేనే వేడి వేడి చాయో ..కాఫో ..పడకపోతే ఎలా ?

వాలు కుర్చీలో కూర్చున్న తాతయ్యకయినా 

కళ్ళ జోడు సరిచేసుకుంటూ .... చల్ల గాలి 

పీలుస్తూ .... వేడి వేడి కాఫీ పడితేనే  గాని 

పేపర్లోని  వార్తలు మనసులోకి దూరవు  ...... 

పది గంటలకల్లా పరుగో పరుగు అనే 

శ్రీవారికయినా సరే .... వేడి వేడిగా కాఫీ 

పడందే .... మెట్లు దిగరు ... ఆఫీసుకెళ్లరు 

చిన్నా పెద్దా  ఎవ్వరికైనా సరే  అమృతమే ..... 

ఏండ్ల నాటి మిత్రబృందం కలుసుకోవడానికైనా 

ఏడడుగులు నడుద్దామనుకునే ప్రేమికులకైనా 

మనసులన్ని విప్పుకుని కుప్పపోసుకోవడానికి  

మల్లెల  పరిమళాలను పంచుకోవడానికి ...... 

మనువు మాట ముచ్చట్ల ఉపోద్గాథలకు... 

సంబంధాల పూర్వాపరాల విచారణలకు ..... 

తెల్లబజారు వ్యాపార లావాదేవీల ఒప్పందాలకు 

అనధికార దళారీల కమీషన్ల ముచ్చట్లకు ... 

ఉద్యోగాల ఊసులన్నీ ఏరుకోవడానికి 

పైరవీల ముచ్చట్లను పక్కా చేసుకోవడానికి 

కష్టాల కొలిమిలో ఒంటరిగా కాలిపోకుండా 

సంతోషాల సంగతులను సన్నుతించడానికి..... 

ఒకటేమిటి .... సవాలక్ష సందర్భాలు 

సందు దొరికితే చాలు మనిషికి ..పసందు 

చేసుకోవడానికి  పక్క వారితో కలిసి 

తేనీటి విందుల తేటతెల్లములు ...... 

నగునూరి రాజన్న 

కరినగరము