జీవన్ముక్తి
తేది : 22-10-2021
శీర్షిక : సంతృప్తి
కవిత సంఖ్య : 781
ప్రకృతిలో పుట్టి పెరిగి పెద్దయినా
పంచడం ...తల వంచడం ఒంటబట్టని
తనమేనాయె.....కాలం కలిసి వచ్చినన్ని
రోజులు అంతా నాదేననే... అహంబ్రహ్మాస్మి ...
అదృష్టం తలుపు తట్టంగానే....కళ్ళు
మూసుకుని అదుపు తప్పి ప్రవర్తించడం ...
లేదంటే .... గమనం గతి తప్పిందని....
గమ్యం గురి తప్పిందని .... వగచి కూర్చోవడం
అరిషడ్వర్గాలను జయించానన్న
అహంభావాల భ్రమల్లో తేలియాడుతూ
పంచ భూతాలను సైతం పరిహసించడం
సృష్టికర్తను కూడా లెక్కచేయనితనమే .....
ఎంతచెట్టుకు అంత గాలిలా
పోలికలు లేకుండా పొల్లు బోని
పనులెన్నో ఫలితాలాశించకుండా
ప్రగతి కొరకు చేసుకుంటూ పోవడమే .....
గీతాచార్యుడి గురుతర బోధనలా ....
ఐదువేళ్ళు ఒక్కలా లేకపోయినా
పెనవేస్తే... చేసే పనులెన్నో .....
విడివిడిగా వాటి పనులవి బాధ్యతలు
తెలిసిన బంట్రోతులా చేసుకుంటూ పోయినా ...
అన్నీ కలిపి అనుసంధానించగలిగితే
సమకూరే విజయాలనంతం .....
సంబరాల తోటలో సంతృప్తిని
మిగిల్చే సన్నివేశం అనన్యం .....
నగునూరి రాజన్న
కరినగరము
No comments:
Post a Comment