రాయబడని కావ్యాలు
తేది : 28-10-2021
శీర్షిక : మనీషి లోని మరో కోణం
కవిత సంఖ్య : 785
అనుక్షణం ప్రజల క్షేమాలను ఆశిస్తూ
అరువదేండ్లు పాలించిన అశోకునికన్నా
పదకోండేండ్లు పాలించిన అలెగ్జాండరును
గొప్పగా చిత్రీకరించిన మీడియా గోత్రాలు...
ఖలునకు నిలువెల్లా విషంలా
మొగిలిపూల వనంలో కాలనాగులా
తరాల ముందు కాలమునాడే తలకెత్తుకున్న
గాంధారపు కాందిశీకుల కౌశలము .....
మితవాదులగ ముద్రలు వేసుకుని
అహింసా వాదులతో అంటకాగి
నోముకున్నోడి ఫలం నోచుకున్నోడి
వంతులా ...తన్నులాటలో తస్కరణలు .....
చాప కింద నీరులా ... తలచినదే
జరిగినదా అన్నట్లు ... తమ ఇష్టాలకు
రాజ్యాంగాలనుకూలం చేసుకున్న
ప్రజాస్వామ్య రాజరికాల గురించి ......
విజ్ఞాలందించాల్సిన విద్యాశాఖ
విహంగాలను నరికి .. వింతగా రాక్షస
ప్రవృత్తులను రమణీయ మనోహరంగా
చదివింపజేసిన పాలనా దక్షతలను ....
అబ్బో .... లక్కు కలిసి వస్తే లెక్కకు
మించి....మనీషి లోని మరో కోణం….
ఎన్నో…ఎన్నెన్నో…రాయబడని కావ్యాలు ….
మనిషి మనిషికి నీడలాంటి మరో చరిత్ర…..
నగునూరి రాజన్న
కరినగరము
No comments:
Post a Comment