శబ్ద లయ
తేది : 18-10-2021
శీర్షిక : ప్రకృతిలోని అణువణువు….
కవిత సంఖ్య : 779
నిశి చీకట్ల నిశ్శబ్దాలను
చీల్చుకుని నిత్య ప్రకాశకుని
ఆహ్వానానికి... విహంగాల కువకువల
సంగీత స్వాగతాలు పలికిన వేళ...
వసంతాల వాకిట్లో లేత మావి
చిగుర్లు తిన్న మత్త కోకిలమ్మ
పాటలకు ....ఎదలు ఊయలలై ఊగగా ....
శబ్ద లయలకు నిలువెత్తు సాక్షాలు....
తొలకరితో పులకరించే అవని మాతకు
కూడా.... అప్పుడప్పుడు మేఘాలు
పంపే ఉరుములు మెరుపులు ... గాలి
ఈలలు .... వెరసి మెరిసే శబ్దలయలే ....
పచ్చకోక చుట్టుకున్న దట్టమైన
అడవులు ... చుక్క చుక్క వర్షపు
బిందువులను ఒక్కటిగా పట్టుకుని
పండుటాకుల గలగలలతో ...కలిసి
పాయలు పాయలుగా సెలయేళ్ళై
పారుతుంటే పసందైన వీనుల విందైన
సరిగమపదనిసలే .....
మనసు పెట్టి వినాలే గాని ....
ప్రకృతిలోని ప్రతి అణువులో
అణువులోని ప్రతి కదలికలోను
నిగూఢమైనదే .... శబ్ద లయ ....
నగునూరి రాజన్న
కరినగరము
No comments:
Post a Comment