వినోదమా...నీవెక్కడ ?
తేది : 15-09-2022
శీర్షిక : హుష్ కాకి .....
కవిత సంఖ్య : 987
అలుగులు పారె చెరువులా
ఆరోగ్యాల భారతముంటేనే
సరస సల్లాపాల
సంతోషాలతో
అంతా ఆనందాల వినోదాలమయమే ...
స్వార్థాల సంచులు నింపుకుంటూ
కల్తీల రాక్షసులను కౌగిలించుకున్నాక
అటకెక్కిన ఆరోగ్యాలు...చుక్కల్లో వైద్యా
ఆనందాల అడ్రస్సులు గల్లంతైన మనిషి .... .
అలసత్వాలతో అలితేరుతూ
కాలుష్యాలను పెంచి పోషిస్తూ
వినోదాల చిరునామాలను మరిచి
పోయి….వెతుక్కుంటున్న మానవాళి ....
ప్రకృతిని పరికిస్తూనే పుట్టి పెరిగినా
పట్టుమని పుణికిపుచ్చుకోని తత్వమే ...
మెట్టుగా త్యాగాన్ని దరిచేరనీయక
"అయితే నాకేంటి లాభం" అంటున్న లోభి ....
అవిభాజ్యాల అనాదరణలతో
ఎవరికీ వారే యమునా తీరగా ...కొంత
పట్టణీకరణ... పారిశ్రామికీకరణలతో
ఒంటరి పోరాటాల బ్రతుకులతో...మరికొంత
కంట పడిన ప్రతిమనిషిని
వాహక ప్రతినిధేమోనని భయంతో
బిక్కచచ్చి అనుమానపు చూపులయ్యాకా ...
అంతంత మాత్రపు ఆనందం కూడా
హుష్ కాకే అయ్యింది .....
నగునూరి రాజన్న
No comments:
Post a Comment