గురువు
తేది : 05-09-2022
శీర్షిక : మానవ శిల్పి ...
కవిత సంఖ్య : 978
బాల్యంలో అమ్మ బోధన
బాధ్యతలో నాన్న మాటలు
బతుకుదెరువులో జ్ఞాన ప్రదాత
గురువు గారు .....
విద్యార్థుల మెదడు కమతాల్లో
ఆత్మీయత తడులను పారించి
ప్రేమాక్షర బీజాలను నాటుతూ
వెలుగు రేఖలను విరజిమ్ముతాడు ...
పచ్చని హరితమై సుశిక్షితమైన
ఫలితాలను అందరికి పంచుతాడు
దేశమంతా విస్తరించి
అన్నపూర్ణయ్యే
సుభిక్షాల హాలికుని పంటలోలె...
క్రమశిక్షణల కవాతులతో
తరాలను తీర్చి దిద్దుతూ
దేశ పురోగతికి పెద్దన్న పాత్రయ్యే
నిరంతర నిజ మానవ శిల్పి ....
నీతి నియమాల నిప్పును
రగిలిస్తుంటేనే ... నిశి చీకట్ల
దారి కూడా వెలుగులమయమై
పల్లె పట్నం దేశం ప్రకాశిస్తుంది ....
సమయానుకూలంగా స్పందిస్తూ
వినయ విధేయతలను అద్దుతూ
మానవత్వ దీపాలను వెలిగించే
మనసున్న నాగరిక మారాజు గురువు ...
నగునూరి రాజన్న
No comments:
Post a Comment