చిత్ర కవిత సా స సంఖ్య : 65 శీర్షిక : హరివిల్లు.... ( a big rangoli - muggu )

 చిత్ర కవిత 

సా స సంఖ్య  : 65

శీర్షిక : హరివిల్లు.... 

ఆవు పేడల కల్లాపి జల్లి

ఆకాశ నక్షత్రాలను అలవోకగ 

అవనిపై దించి అందాలను పేర్చే

అనంత నైపుణ్యాల అతివల నేర్పరి.... 

అందమైన రంగుల హరివిల్లు

అలరించే హంగుల విరిజల్లు

బిందువులు మొగ్గల సోయగం

అందంగా బిగించిన కేంద్ర పద్మం 

అల్లిబిల్లి తీగల్లో అలరించే 

కుసుమ మనోహరం.... 

శుచి శుభ్రతలకు నెలవయ్యే

సప్త వర్ణాల సుమ సంగమం 

సుందర దృశ్యాల విరిబోణి 

సుమధుర తేనియల సుందరం.... 

పడతుల హస్తవాసి పదనిసలు

పండగలు పబ్బాలకు ప్రతిబింబం 

సంప్రదాయ ఆస్తుల సరంజామ

మనిషి మనసుకు సంకేతం..

మచ్చలేని చందమామల సాదృశ్యం 

మనోల్లాస గీతికల మాలా చంద్రిక

సరససల్లాపాల సందళ్ళ సంక్రాంతి 

పల్లె పట్టులో నేటికి ప్రతిబింబించే ఘట్టం ....

నగునూరి రాజన్న

కరినగరము.