తరగని ఆస్తి
శీర్షిక: విద్య వారసత్వాలు...
తేది: 26-05-2021
కవిత సంఖ్య : 131
తగుదునమ్మా అంటూ తాదూరిపోయినా ...
ధన కనక వస్తు వాహనాది సిరి సంపదలు
దానం చేస్తే ఎదో ఒకరోజు తరిగిపోయేవే
కాలగమనంలో ఎలాగోలా కరిగిపోయేవే ...
అందరూ బాగుండాలనే ఆలోచన
అందులో నేనుండాలనే ఆత్మీయతలు
మంచితనమును మించిన
సుగుణ సంపదలేమున్నాయి...
పంచిన కొలదీ పెంపు చెందే
అక్షర జ్ఞానాల అమృత తత్వం
పసిడి పూతల విజ్ఞాన సంపదలు
చోర భయమెరుగని చోద్యపు నిల్వలు ...
ప్రజా క్షేమాలే ప్రాణప్రదమన్న
ప్రభువులను కన్న పుడమి తల్లి
అడుగడుగున విషనాగులను ఎదిరిస్తూ
ధర్మ రక్షణకై కంకణం కట్టుకున్న కన్నయ్య
పుట్టిన ధరిత్రీ సంస్కృతి సంప్రదాయాలు
నా దేశ సౌభాగ్యాలు ....
ఆధ్యాత్మికతలను అవపోషన పట్టిన
ఆది గురువులనెందరినో కన్నతల్లి
అనేక మంది మహానుభావులను
అక్కున చేర్చుకుని అనునయించిన
మహా సాధ్వి నా భరతమాత....
వలసవాదుల బానిస సంకెళ్ళను
భల్లున విరిచి ఎదిరించి పోరాడి
వీరమరణం పొందిన వీరులను
కన్నతల్లి...నా జన్మ భూమి...ఆనవాళ్ళు
తలపుల్లో మునిగి తేలిన నా
తలపులన్నీ తరగని ఆస్తులే.....
నగునూరి రాజన్న
కరినగరము.
No comments:
Post a Comment