నీ అళికిడి లేక
తేది : 26-05-2021
శీర్షిక: హాయిగా ఊపిరి పీల్చుకుంటున్నాం....
కవిత సంఖ్య : 672
నలుపు తెలుపుల కాలంనుండి
నగారా మోగించి రాజ్యమేలుచుండె
ఉదయత్పూర్వమే ఉరుకు లంఘించి
ఊసుపోక కబుర్లన్నీ ముందేసుకుని ....
భక్తి భావాల పరిమళాలు వెదజల్లుతూ
బయలుదేరి పల్లెలను పలకరిస్తూ
పట్టణాలను కలియ తిరుగుతూ
నలుదెసల న్యూసులు కలబోసుకుని ...
పాలనలను పరామర్శించుచూ
చిత్ర విచిత్రాలను పోగేసుకుని
ధారావాహికల గుదిబండలను కూడా
కర్ణభేరీల్లోకి వంపేసి దులిపేసుకునేది ....
రికాము లేకుండా నిరంతరం శబ్దం
చేస్తూ అరిచి గీ పెట్టయినా సరే
అనుకున్నది అనుకున్నట్టుగా
ఆదమరిచినా చెవిన పడేట్టు ....
ఇంట్లో మనిషిలా ఎల్లప్పుడూ
మన మాటలు వినకపోయినా
చెవిలో జోరీగలా చెప్పుడు ఖాయం
యూనిలాటరల్ బిహేవియరే ....
కరోనా కరాళ నృత్యంతో విసిగి వేసారి
కల్లోల వార్తలు చూసి చూసి
మూడు నెలలనుండి నిన్ను కట్టేసి
హాయిగా ఊపిరి పీల్చుకుంటున్నాం....
నగునూరి రాజన్న
కరినగరము
No comments:
Post a Comment