ఇల్లే ఇలలో స్వర్గమనీ తేది :22-06-2021

 ఇల్లే ఇలలో  స్వర్గమనీ 

తేది :22-06-2021
శీర్షిక : ఊటల చెలిమ …. 
కవిత సంఖ్య : 693 

అణువునైన నాకు ఆది దేవుళ్ళైన 

అమ్మా నాన్నలనిచ్చి ఆత్మీయతలు అల్లింది... 

తోబుట్టువులతోడ బంధమేర్పరచి

అనురాగ తీగలు ఎగబాకిన రెల్లు పొదరిల్లు… 

బుద్ధినేర్చిన దగ్గరనుండీ 

బువ్వపెట్టి దీవించింది  

ఆటపాటలకు నిలయమై 

అవసరాలన్నీ ఒకటొకటిగా తీర్చుతూ

హత్తుకుని సేద దీర్చిన సెలయేటి 

ఊటల చెలిమ…. 

చిన్నా పెద్ద వస్తువులతోడ

చిరకాలాల పరిచయాలతో

విడదీయరాని బంధమేర్పడి

వింత అనుబంధాల భాండాగారం…. 

ఎన్నిరోజులైనా ఎంతదూరమైనా 

పయనించి పయనించి మళ్ళీ 

మాన గూటికి మనం చేరితేనే కదా 

మానసిక ప్రశాంతత మనోల్లాసాల స్వర్గసీమ…. 

స్వచ్చంగా మనసారా నవ్వాలన్నా 

స్వేచ్ఛగా బాధలననుభవించాలన్నా  

కంటినిండా గుర్రు నిదుర పోవాలన్నా 

కడుపునిండా రుచులు దట్టించాలన్న 

సర్వ స్వతంత్ర సత్తాక గృహసీమనే కదా .... 

పెళ్లి పేరంటాల  మధుర క్షణాలను 

పిల్లా పీచుల  అనుబంధాలను 

లెక్కలేనన్ని తీపి గుర్తులకు కేంద్రమై 

నాకు కుటుంబానికి చిరునామాగా నిలిచింది…. 

నగునూరి రాజన్న 

కరినగరము