మట్టి వాసన
తేది :02-06-2021
శీర్షిక: భిన్నమైన ఏకరూపము.
కవిత సంఖ్య: 30
పంచభూతాల పరిమళాలే కదా
పావనమైన జీవరాశి జన్మలు
ప్రకృతి వితరణలే కదా సదా
ప్రతిజీవికి పోషణలు అనుక్షణం ....
తొలకరిలో ఎగిరే ధూళి వాసనే కాదు
ప్రతి దేహ ఆరావళికో శరీర వాసన
విషతుల్యమయం రసాయనాలేసినా
అమృతమయమైన ఆహారలిస్తుంది ....
గుళ్ళబార పొడిచి పొక్కిలి చేసినా
కడుపార నింపే పాడి పంటలిచ్చు
నిలువెల్ల గాయపడు బావులు తోడినా
దూపదీర తాగునీరు సాగునీరిచ్చు....
మందుగుండుతో పేల్చి గర్భం చీల్చినా
ప్రగతి పేరుతో పరుగుపెట్టే ఇంధనాలిచ్చు
బోరుబావులేసి కడుపంతా కెలికినా
గాసని ఆయిలని ధాతువులనిచ్చు....
మట్టిరంగులో నలుపయినా
రంగు రంగుల ఫల పుష్పాలనిచ్చి
రమ్యమైన జీవిత ఆనందాలు పంచి
లెక్కలేనన్ని జీవరాశుల క్షుద్భాదలు తీర్చు ....
తీపి చేదు పులుపు వగరు ఉప్పు
కారాలనిచ్చే షడ్రుచులను కూడా ఇచ్చి
కామ క్రోధ మోహ లోభ మద
మాత్సర్యాలైన అరిషడ్వార్గాలతో
ఆ విరించి ఆటకు ఊతమిచ్చు.....
మొత్తంగా ఏకత్వంలో భిన్నత్వంగా
గోచరించినా... భిన్నత్వం ఇముడ్చుకున్న
ఏకత్వమే సుమా....చివరి మజిలీలో కూడ
మనందరికి చోటిచ్చి చేరదీస్తుంది మాతృమూర్తిగా.....
నగునూరి రాజన్న
కరినగరము.
No comments:
Post a Comment