వీడియో కవిత
తేది: 01-06-2021
శీర్షిక: గుణపాఠం
కవిత సంఖ్య: 133
పంచి ఇవ్వడమే పంచభూతాల పని
ప్రథమంగా తానాచరించి పట్టి నేర్పినా
పట్టని మనిషి ... పెట్టని కోటలు తాను
నిర్మించుకుని గట్టిగ నిర్ణయించుకుంటె
పట్టుపట్టి చేయగలిగిందింకేమిటి ...?
వీడియో చూసిన విస్మయమే మరి
విరివిగ విజ్ఞానాల ఖనిని నేనంటూ
విర్రవీగు జనులకు వింత గుణపాఠం
నోరు లేని కందిరీగ విజ్ఞతకు వినమ్రమై ....
ప్రాణి చిన్నదైనా పదిల పరిచె
పసిడిజ్ఞాపకాల పండంటి మూటను
సహజీవిపట్ల సహనంబు బూని
ప్రాణం పోయిన మిడతను పాతి పెట్టె
పద్దతిగా మరు భూమిలో .....
తనకేమి కాకున్నా సాటి ప్రాణికి
సంకుచితమెరుగని సైనికుడై
సంకనేసుకుని.. అల్లంత దూరాన
అనువైన చోటున బొరియ చేసి
బొంది పూడ్చె కర్మ కాండల తంతుగా ....
అంతంత మాత్రంగా అంచుననున్న
మానవ సంబంధాలను సాంతం
మట్టి కరిపిస్తున్న ఇట్టి కరోనా కాలంలో
కాగలదు కాగడా కందిరీగ సేవలు ....
నగునూరి రాజన్న
కరినగరము.
No comments:
Post a Comment