ప్రేమ గీతాలు
తేది : 05-11-2022
శీర్షిక : ఇదేనేమో ....
కవిత సంఖ్య : సహస్రాధికం
ప్రేమంటే ఇదేనేమో
ఇలాగే ఉంటుందేమో ...
ఆలోచలల్లుకుని
కులుకు పలకరిస్తోందా ...
అవనిమాతా మీదా
కాలు నిలవనీయదా ...
మదిలోన పదిలమై
మననంతో ఘనమవుతూ
తరువు గాలి సైతం
తపన వేడినిస్తుందా ....
ప్రేమంటే ఇదేనేమో
ఇలాగే ఉంటుందేమో ...
మత్తు ఏదో ఆవరించి
మధురిమలు పంచుతూ
సెలయేటి గలగలల
జలతారు మీటుతుందా ....
కూ అంటే కుహూ అంటూ
కుతూహలం పెంచేసి
కొండ కోన కోటి ధ్వనుల
సంగీతమౌతుందా ...
ప్రేమంటే ఇదేనేమో
ఇలాగే ఉంటుందేమో ...
మనసంతా నిండుకుని
పరవశాల పులకరింపు ...
కుసుమ కోమలం కూడా
కుదురుగ తోచనీయదా ....
పిలుపులకు పలకలేనా ...
పెన్నిధిలా పెనవేసుకుని
సన్నిధిలా తోడుంటుందా ...
ప్రేమంటే ఇదేనేమో
ఇలాగే ఉంటుందేమో ...
గుండె అంతా బరువెక్కి
గుక్కబట్టి తపిస్తుందా ....
హృదయమంత ఆవరించి
హరివిల్లుగ తోస్తుందా...
మెలకువలో కలవరిస్తూ
కలలోన విహరిస్తానా ....
నన్ను నేను మరిచిపోయి
మయూరాన్ని అవుతానా...
ప్రేమంటే ఇదేనేమో
ఇలాగే ఉంటుందేమో ...
అద్దంలో చూసుకుని
నాకు నేను మురుస్తానా ....
ఎవరెవరినో పిలిచినా
కోయిలలా పలుకుతానా ....
మనసంతా విచ్చుకుని
విరిసే పువ్వై తోస్తుందా ...
హృదయమంతా పరుచుకుని
గువ్వలా ఎగురుతానా ....
ప్రేమంటే ఇదేనేమో
ఇలాగే ఉంటుందేమో ...
నగునూరి రాజన్న
No comments:
Post a Comment