ఆనందపు దివిటీలు
తేది: 24-01-2022
శీర్షిక : కంటి పాపలు ....
కవిత సంఖ్య ...829
అలితేరే అలసటల తోటలలో
విశ్రాంతెరుగని విపంచి బాటలలో
అమ్మానాన్నలు ఆదమరిచి సేద దీరేది
చిలిపి చేష్టల చిన్నారుల చింతనలతోనే….
కష్ట నష్టాలు కనికరించనప్పుడైనా….
సుఖ సంతోషాలు సమీపించనప్పుడైనా…
చిన్నారుల బుల్లి బుల్లి మాటలు…
చిట్టి పొట్టి తప్పటడుగుల కంటిపాపలే .....
తప్పని భరోసాలు ......
ఎదలన్నీ బాధలతో బరువెక్కినా…
బాధ్యతల బడిలో ఉత్తీర్ణతలూరించినా
పసివాడి బోసి నవ్వులు.. పలకరించగనే
విహంగాలై వినువీధిలో విహరింపజేయు….
అక్షరాస్యతల శిక్షణలు గావించుకుని
ప్రయోజన వంతులై పదిలపడినప్పుడు
సంఘంలో సింగంలా తచ్చాడుతుంటే
అమ్మానాన్నల హృది ఆనందతాండవమే .....
పిల్లయినా పిల్లోడయినా వంశకీర్తిని
వరుసగా ఏకరువై ఇనుమడించినప్పుడు
అమ్మానాన్నల కనుసన్నల్లో మెరిసేది
ఆనందాల దివిటీలే ....
నగునూరి రాజన్న
కరినగరము
No comments:
Post a Comment