అధికార దర్పం
తేది : 17-01-2022
శీర్షిక : మడతబడ్డ నాలుక
కవిత సంఖ్య : 824
ఆత్మీయతలు అల్లుకున్న తీగలు
మల్లె పరిమళాలు జోడించుకున్న
మానవత్వపు మచ్చు తునకలు
కానరాక ... కళ్ళు పత్తి కాయలై పోయే ....
సన్నాయి నొక్కులతో సరాగాలు
వల్లించిన నోళ్లతో ...విందులు వినోదాల
వద్దింపులతో... తిన్నదరక్క వేసుకున్న
తిక్క తాంబూలాలతో నాలుక మడతబడి
మాట తిరగబడుతున్నది .....
అయ్యా బాంచానని అడుక్కున్న ఓట్లని
మరిచిపోయి... ఐదేండ్లు గద్దెనెక్కి ..అసలు
నువ్వెవరంటూ కండ కావరాలతో... కాలు దువ్వి
ఖజానాలపై పెత్తనం చలాయిస్తున్నరు....
ప్రజా సేవల పేరుతో బయలెల్లిన ..
ధవళవస్త్రాల సేంద్రీయ ఎరువుల
దండుపాలెమంతా కలిసి...ఇప్పుడు..
కపట కార్పొరేట్ల హైబ్రీడ్ల సాయమంది
కంపు రసాయనాలు వెదజల్లుతుంది ....
జీవరాశిలో గొప్పోన్నని విర్రవీగే మనిషి ...
పేర్లు మార్చుతూ పెత్తనం చేజిక్కించుకుని
ఆడిందే ఆటగా ... పాడిందే పాటగా ....
వెలగబెడుతూనే ఉన్నాడు అధికార దర్పం .....
నగునూరి రాజన్న
కరినగరము
No comments:
Post a Comment