బంగారు క్షణాలు
తేది: 24-03-22
శీర్షిక: నవ్వుల హరివిల్లులు
కవిత సంఖ్య: 239
తెలిసీ తెలియని వయసున
తేనె మధురిమలను ఆస్వాదించిన
బాల్యం…
గోళికాయలాటలలో గొడవలు పడినది
చిర్ర గోనెలాటలో చిర్రు బుర్రులాడినది
కబడ్డీలాటలో కాళ్ళు చేతుల దెబ్బలతో
ఆటల్లో తొండి చేసి తోటోల్లపైన గెలిచిన
సందర్భాలు…।
ఆట పాటల్లో మిత్రులతో పోరిన బాల్యం
అటకలెక్కి దొంగ దొరాట ఆడిన వైనం
చూచి రాతల పనులన్నీ చూడకుండా రాసేయడం
బడికెల్లి మాష్టార్లతో దెబ్బలు తిన్న విద్యాభ్యాసం …
ఎండాకాలం సెలవుల్లో ఎగబోస్తూ
బావులలో చెరువుల్లో ఈతలు కొట్టింది
ఆరు నుండి పది వరకు పక్కూరు బడికెల్తూ
పంట చేలల్లో పడి పడి ఏరుకుని తిన్నదీ…
అమ్మానాన్నలు ఖర్చులకిస్తే
సినిమాల మోజులో చిత్రంగా
ఖర్చు చేసేసి... ఉత్త చేతులతో
ఊరేగిన ఒంటరి క్షణాలు ....
బాధ్యతలను తలకెత్తుకోక ముందు
బహులెస్సగ చదువులు సాగిస్తూ
బలాదూరుగా తిరిగిన క్షణాలన్నీ
బంగారు క్షణాలుగా డైరీల్లో నిక్షిప్తం ...
ఒక్కటేమిటి... ఒడువని ముచ్చట్లే అన్నీ
నాటి యాతనలన్ని నవ్వులు తెప్పిస్తుంటే
బాధ్యతల బరువులెంత భద్రంగా చూడాలో
నా కాకమ్మ కబుర్లన్నీ కథలోలె పిల్లలకు
చెప్పి నవ్వుల హరివిల్లులు పూయించేవాణ్ణి ...
నగునూరి రాజన్న
కరినగరము
No comments:
Post a Comment