పలకని కలం
తేది : 19-03-2022
శీర్షిక : కలి పాలనాలు
కవిత సంఖ్య :
పుట్టుకే అబద్దాల పుట్టయినా
పెట్టని కోటగా నిర్మించుకున్న
కట్టుదిట్టం… పట్టని పాత్రికేయం..
పేరుకు మాత్రం ప్రజాస్వామ్యం…
కాకులు దూరని కారడివైనా
చీమలు పెట్టిన పుట్టలో
చిరు నాగులు చేరినట్టుగా ...
వింతగా నోముకున్నోడి ప్రసాదం
నోచుకున్నోడి పాలవుతున్నది ....
అయ్యయ్యో పాపమంటూనే ...
అంతా గప్చుప్ గా కానిచ్చేయడాలు
నిజం నిప్పని తెల్సినా…నిర్భయముగ
పక్కోడికి పంచి పెట్టిన తత్వాలు...
అభివృద్ధి మంత్రాలు వల్లిస్తూనే
అణా కానీలన్నీ ఆమ్యామ్యాల పర్వం…
సంక్షేమ పథకాల పేరు చెప్పి
సంకల్ప మంత్రాలు మాత్రం స్వార్థపూరితం…
ప్రణాళికలన్నీ పక్కా సమాచారాలే
అమలుకొచ్చేవరకు పక్క మార్గాలు ....
లక్షల కోట్లు లగాయించినా...
దిక్కు మొక్కు లేని దివాణం చందమే ....
కోటరీల వ్యవస్థలతో కొల్లగొట్టె కోట్ల టంకం…
కాకలు తీరిన గండరగండడులైనా
కనుసన్నలలో మెదలక పోతే
భూస్థాపితాలకు సుముహూర్తం ....
ఆత్మసాక్షుల ఆజ్ఞల అమలంటూ
ఎదురు తిరిగే శ్వాస సృషించినా
శవాలతోనయినా ఆట మొదలే ...
పచ్చి నెత్తురు పీల్చుకునే జలగల్లా
పశువులను పట్టుకునే గొమారిల్లా
తరాలు గడిచినా తప్పని తండ్లాటలే
నరాలు వడిపెట్టిన సామాన్యుల సంపాదనలన్నీ
పన్నులపాలే… సమాధులపాలే…
ధర్మసూత్రాలను వల్లిస్తూనే
ధనదాహాలను తీర్చుకోవడానికై..
చాపకింద నీరులా వ్యాపించి
చద్దన్నం మూటలు మాయం …
ధర్మం ఒంటరి అయిందని ....
దన్నుగా పాలనాంగాలు నాలుగ్గా
విభజించినా ...ప్రజల ఆయుధం
పత్రికలని ఘోషిస్తున్నా…అన్నింటిని
గుప్పెట బందిస్తూ ఆట పాటలన్నీ
అభినివేశమై సాగనిస్తున్నారు ...
తరాలు మారితేనన్నా... కొంత
తండ్లాటలు తప్పుతాయేమోంటే ...
ఎదురుచూపులతోనే కాలం కదలిక ...
కలుషిత నాలాలై పారుతున్నాయి .....
కరి మింగిన వెలగపండులా
కుంభకోణాల దాణాలు మింగి మింగి
తరాలనన్నీ తనలోనే కలుపుకుంటూ
బ్రహ్మ రాక్షసిలా బలోపేతమాయె.. కలిపాలన
గీతాచార్యుడు బోధించినట్లు ...
ధర్మం దారి తప్పినప్పుడల్లా
ప్రచండమై తానే వస్తానన్నట్టుగా .....
ఎదురు చూపులే ప్రజలకు ఆశల పల్లకి ....
కానీ..వజ్రోత్సవాలు దాటుతున్నా
పాపాల పుట్టలు గాని ... అబద్దాల
చిట్టాలు గాని...పాతాళ గరిగెలకు కూడా
అందనంత తరగని ఆస్తిగా తయారయ్యింది..
కోట్ల మంది దీనుల కళ్ళు చెమర్చినా ....
ఏ ధైర్యవంతుని కలం కదలలేకపోయింది ....
కళ్ళముందు కల్లోలాలెన్నయినా
పాపమని పలకరించ లేకపోయింది ...కలం…
నగునూరి రాజన్న
No comments:
Post a Comment