తారుమారు
తేది: 10-03-2022
శీర్షిక : చిత్తు బొత్తు
కవిత సంఖ్య : 234
నాగరికతలో నాలుగు అడుగులేసిన
జనులంతా .... పారిశ్రామికీకతలో
పరుగు లంఘించుకున్నాక ...
పక్కవారిని పట్టించుకోలేనంత వేగం ....
ఆత్మీయతలు పంచాల్సిన
అమ్మానాన్నలు సైతం
పని రాక్షసులతో కుస్తీలు
పడుతూ ... పిల్లల పెంపకంలో
ఉదాసీనతలు ప్రదర్శిస్తున్నారు ...
అడిగినవన్నీ అలవోకగా
సమకూరుస్తూ ... ఆలన పాలనలు
అద్దె తల్లులకు అప్పగిస్తూ ...
అనురాగాలకు తెరలు వేస్తున్నారు ...
అప్పనంగా వచ్చే అప్పులకు
ఆకర్షణీయమైన వాయిదాలకు
వాహనాల కొనుగోళ్లతో .. పరుగులు తీస్తూ
ప్రత్యామ్నాయాలకు ఆకర్షితమై
పసందులను తీర్చుకుంటున్నారు .
భవబంధాల గందరగోళమెరుగని
బాధ్యతల భావాలెరుగని యువత
రక్షణ పాటించక రయ్యిమంటూ
చిచ్చర పిడుగులై ... స్వీయ
నియంత్రణలకు తిలోదకాలిచ్చి
పయనాలలో వాయువేగాలతో
పోటీ పడి సత్తా చాటాలనుకుంటున్నారు ...
అటు ఇటైనా.. ఇటు అటైనా
అందరి జీవితాలు అటకెక్కి
తారుమారె .. కుటుంబాలన్నీ
కుదేలే ...బతుకుబండి చిత్తు బొత్తే...
నగునూరి రాజన్న
No comments:
Post a Comment