నీలాల నింగి
09-03-2022
శీర్షిక: కంచుకోట
అందాల మందారం
అవనిపైన అంబరం
చీకటి వెలుగుల సంబరం
పగలు రాత్రుల సంబంధం ...
పగలంతా ఊదారంగుతో
పరిమళించి పలకరిస్తూనే…
రాత్రేమో చిమ్మచీకటిని ఆవరించి
చిట్టి వెలుగులు చిలకరించు ....
ఉభయ సంధ్యలలో
కెంజాయ వర్ణాల కెంపులతో
ఒళ్ళంతా పులకరింపజేసి
కళ్లంతా ఆనందాలు నింపు ....
కవ్వములా మనల్ని తిప్పుకుని
కాలాలను పరిచయం చేసి
కనికరిస్తుంది ఎండా వానలిచ్చి
జీవరాశికి కడుపులు నింపుతూ ...
వడిగా వచ్చే వేడి గాలులకు
ధూళి దుమ్ములతో నిండగానే…
దూది పింజముల మేఘాలను
పిండుకుంటూ భూమి బిడ్డకు
తలంటు స్నానాలు చేయిస్తుంది …
అపార విజ్ఞానాల అంతరంగం…
ఆశగా విసిరిన గులేరు వలలకు
అమ్మగా... గురువై అందిస్తుంది
ఖగోళాల కనువిప్పులు కలుగజేస్తుంది ....
కంచుకోటలోని మంచు బిందువుల
లెక్కలప్పజెప్పి... కాపలాగా రేరాజును
నియమించి కాలగణనాలతో కబాడి
ఆడించి... నాగరికతకే నడక నేర్పింది....
అయినా అప్పుడప్పుడు పిల్లచేష్టలే…
కోతిమూకల్లాంటి పిల్లలతో
చేతులు కలిపి చిలిపి ఆటల్లో
మునిగి పిడుగుల పిడిగుద్దులతో
సద్దుచేసి బాధలను బట్వాడా చేస్తుంది...
నగునూరి రాజన్న
కరీంనగర్.
No comments:
Post a Comment