సమ న్యాయం
తేది : 27-06-22
శీర్షిక : పేరు గొప్ప విశ్వ వేదికలు….
ప్రకృతమ్మ పాఠాలుగా
వల్లించినా పట్టలేదు
పంచభూతాలన్ని కలిసి
ప్రత్యక్ష సాక్ష్యమైనా కదల్లేదు....
జీవరాశిలో మిన్నంటూ
విర్రవీగే మనుషులేమో..
ఆడమగల తేడాలంటూ
అణచివేస్తుండే కొందరిని…
విజ్ఞానాలఖనులమని ఛాతులు
విరుచుకునే మానవాళి…
సుద్దిబుద్దులు పిల్లలకు నేర్పక
రాక్షసానందాలు పొందుతుండె…
జీవం పోసే పసలేకున్నా
ప్రాణాలు హరించే వ్యూహాలు
పన్నుతూ…ముక్కుపచ్చలారని
ముద్దు బుడతలకు మారణాయుధాలందిస్తూ…
విజ్ఞానాల వెలుగులలో
ఆనందంగా కలిసి మెలిసి
జీవించాల్సిన మనమంతా
ఆటవికానికి మళ్లుతున్నామా...
ధన మద మాత్సర్యాలకు
దాసోహం అవుతూ…
స్వార్థం చేతిలో సంకెళ్ళు పడి
బంధుప్రీతి తత్వంలో బంధీ అయిపోయి
ఉత్తర దక్షిణలకు ఉరివేసుకుంటుంటే
ఇంకెక్కడ మానవాళికి సమన్యాయం ….
కొంతమంది దాహాలకు
కోట్లమంది బలౌతుంటే
కోరి నిలిచి మాట్లాడని
పేరు గొప్ప విశ్వ వేదికలు….
నగునూరి రాజన్న
No comments:
Post a Comment