నాన్న గేయాలు
తేది : 18-06-2022
శీర్షిక : మా నాన్న
కవిత సంఖ్య : 922.
మల్లెలాంటి తెల్లటి రూపం
మంచుముత్యపు మాటల తీరు
పల్లె ప్రజలకు ప్రీతిపాత్రం
బంధుమిత్రుల భరోసాసూత్రం ...
వెలుగుపూలను నెత్తికెత్తుకుని
తాను నడకలు సాగిస్తేనో ...
వెన్నంటి నడిచేవి పచ్చపూలు
వేలుపట్టుకుని వెనక వచ్చేవి
ఋతువు కాలాలు ....
దివ్య వైష్ణవ నామాలంకారం
గురూపదేశపు నిష్ట మానసం
నిత్య భగవద్గీతా పారాయణం
అల్లుకున్న ఆధ్యాత్మికతత్వం….
గుండెల నిండా ప్రేమలు నింపి
గుంభనంగానే ప్రదర్శించు...
చిట్టి పాదాలకు గట్టి నడకలు నేర్పి
గుండె
పరుపులపై సదా ఆడించు ....
పాయాసంలా పారే ప్రేమను
పొంగనీయని పాత్ర అంచుల్లా
కంటికి రెప్పై కాచుకును
ఇంటికి పైకప్పులా రక్షించు .....
కంటి సైగల తోనే సదా
క్రమశిక్షణలు నేర్పించి
కరుణామృతములు పంచి
సేదలు దీర్చువాడు .....
ఆకలి కడుపులు నింపంగా
అమ్మ సర్దుకుంటేనో ....
అవసరాల బాధ్యతలో
బాధలన్నీ సర్దుకును మా నాన్న ....
నగునూరి రాజన్న
కరినగరము
No comments:
Post a Comment