పిడికెడు మట్టి
తేది: 13-07-2022
శీర్షిక: అన్నిటికి మూలం
కవిత సంఖ్య : 935
ఆకాశమంత తరువుకైనా
పిడికెడు మట్టే ప్రాణం ...మరకత
శోభలొలికే భూమాత.... జీవరాశి
ప్రాణవాయువులకు మూలం ....
మనిషికైనా పుట్టినపుడు
గిట్టినపుడు కావాల్సిందంతే ....
పిడికెడు మట్టి రైతు చేతికిస్తే
ఆకలి తీర్చే అన్నంతో అమృతాన్ని
నీకందించి ప్రాణాలను
నిలుపుతాడు ....
పిడికెడు మట్టిని శాలివాహనుడు
సారె మీద సయ్యాటలాడించి
సృజనాత్మకతలు జోడిస్తే
వయ్యారాలొలికే పాత్రల అవతరణలు ....
పిడికెడు మట్టికే పితలాటకాలెన్నో
మారణ హోమాలు ...మరుభూమిని
తలపించే అనేక యుద్దాలు ...చరిత్రల
నిగూఢమైన నిక్షిప్తాలకు కారణాలు .....
పంచభూతాలలో ఒకటి అయినా
షడ్రుచుల మేళవింపులకు
సప్తవర్ణాల రంగులకు... మనిషిలోని
అరిషడ్వర్గాలైన కామ, క్రోధ, లోభ,
మోహ, మద మాత్సర్యాలకు మూలం .....
నగునూరి రాజన్న
No comments:
Post a Comment