కన్నీటి చుక్క శబ్దం
తేది : 14-06-2022
శీర్షిక : ఎక్కడని .... ?
కవిత సంఖ్య : 921
భూమి పుట్టినప్పటి నుండి
భూరిగా వస్తున్న ఆచారమో
ఏమో ... బలవంతుని బాహువులలో
బందీ అయి నలిగిపోతున్న బలహీనుని
కన్నీటి చుక్క శబ్దం ....
తప్పుల సంపాదనల కుప్పల
మీద కూచున్న కరుకు గుండెలకు...
ఎలా తెలుస్తుంది కరిగిపోతున్న
కన్నె పిల్లల కన్నీటి చుక్కల శబ్దం ...
ధన దాహం నిలువెల్లా దహించి వేస్తున్న
గంజిస్త్రీ ధవళ వస్త్రదారులకు ...
ఏమర్థం అవుతుంది తరాలనాటి నిలువ
నీడలు వదిలి వెళ్లే నిర్వాసితుల గుండె
లోతుల్లోని అలల సడికి రాలిపోతున్న
కన్నీటి చుక్కల శబ్దం ....
లక్షల జీతాలతో వేల అలవెన్సులతో
వెలిగిపోతున్న వారికి .... ఏమని చెప్పేది
తాత్కాలిక ఉద్యోగుల తండ్లాటల నిత్య
జీవన యదార్థ గాథల కన్నీటి చుక్కల శబ్దం .....
నాగరికతల నడకల్లో సన్నగిల్లి .....
యాంత్రికతలతో కొంత తగ్గిపోయి ....
సాంకేతికతల నీడల్లో సాంతం కనుమరుగైన
మానవత్వపు జాడలకై వెతుకులాడుతున్న
మనిషి ..... ఎక్కడ నీ ఆచూకి…
నగునూరి రాజన్న
కరినగరము
No comments:
Post a Comment