ఉన్నది ఒక్కటే జీవితం
తేది : 14-07-2022
శీర్షిక : మరణం తదుపరి బ్రతకవచ్చు
కవిత సంఖ్య : 936
విశ్వంలోకెల్లా వింత జీవినని
విర్రవీగే మనిషి మాత్రం
ఎందుకో ప్రకృతితో పందెంలో
పదే పదే ఓడిపోతూనే ఉన్నాడు ...
తరువులా నిలువెల్లా తనువు పరులకై
సమర్పించుకోవాలనుకున్నా...
స్వార్థాలతో సాగిలబడి ముసుగేసుకున్నా
అంతా మన చేతిలోనే మనువు ....
విరిసిన కుసుమం వింతగా పరిమిత
కాలంలో వసి వాడుట ఖాయం ....
పరిమళాలు వెదజల్లినా... లేకున్నా ....
మన జీవితమూ అంతే .....
పాలలా ఓ పూట పదిలమవాలన్నా
పెరుగులా రెండ్రోజుల్లో పులవాలన్నా
నెయ్యిలా హోమమై వెలగాలన్నా
మన జీవితం... మన చేతుల్లోనే ....
సానుకూలవైఖరులతో సంపెంగల
పెంపకాలు కొనసాగించినా ....
మనువంతా మల్లెల పరిమళాలు
వెదజల్లి విరజిమ్మాలన్నా ...
మరువలేని చిరకాల జ్ఞాపకాలను
మనం నిక్షిప్తం చేసుకోవచ్చు ....
మరణం తదుపరి కూడా మనం
బ్రతికి చూపించవచ్చు .....
అపురూపమైన అవయవదానాలతో ....
నగునూరి రాజన్న
No comments:
Post a Comment