అంశం : నీవొక పచ్చని చెట్టువైతే
తేది - 09-06-2019
శీర్షిక - షష్టమ భూతాన్ని ...నేను
సంఖ్య - 207
పచ్చని తరువై నేనుంటే నులి వెచ్చని జీవితమిస్తానని హామీ ఇస్తున్నా !
తెలియందని కాదు... వివరం తెలుపుదామని మిత్రమా....
నీ కంటి మెరుపుల్లోనే నా ఆనందాలు వెదుక్కున్నా నేస్తమా....
విశ్వం కన్ను విచ్చుకున్న నుండి పరికించు
అనాగరికతలో ఆవాసమై గూడు నిచ్చా ....
క్రూరమృగాల విషసర్పాల బారి కాపాడ....
సకాల వర్షాలకు... సమ శీతోష్ణస్థితులకు ....
సదా నేస్తమయ్యా చల్లని పిల్ల గాలి తెమ్మెరనై...
ఆకలిని తీర్చంగ అమ్మనై పండు ఫలమిచ్చా ....
అత్యవసరాల వంటచెరుకుగా సన్నిహితున్నై ఆదుకున్నా ....
అవసరాన ఇల్లు వాకిళ్ళకు బంధువై అండగానిలిచా...
అదుపు లేని విలాసాలకూ అడ్డు చెప్పలేదు ...
చివరి మజిలీ చితి మంటలకు సాక్ష్యమయ్యా....
యుగాలు మారి రాటుదేలి రాక్షస బొగ్గయ్యా...
విచ్చలవిడి పాలకులు పన్నులేసి దోచుకుంటున్నా
మీ స్వార్థాలకు బలి అవుతూ కూడా కిమ్మనలేదు....
ప్రతి క్షణం గుర్తించక పోతారా అని పడిగాపులు కాస్తున్నా ...
ఇళ్ల మధ్య గోడలకు పగుళ్ళని వేళ్ళూన పెకలిస్తున్నారు....
ఆకు రాలిందనో... నాచు కట్టిందనో ... కబళిస్తున్నారు...
జన్మంతా సేవ చేసినా... జనం గుండెల్లో చోటు దొరకలేదు....
చెట్టులేని విశ్వరూపం చూసి తట్టుకోలేవు ...... మిత్రమా...
నా కనుమరుగే నీకు కనువిప్పు కారాదు.... నేస్తమా
సౌకర్యాల సరంజామా ఏ సి, కూలర్, ఫ్రిజ్ లని మురిసిపోకు ...
ఎవరితో నాకేంటని విశ్రమించకు...ఇప్పటికైనా మించిపోలేదు
భరించరాని నివాస వేడే కాదు.. బతుకు జీవునికి నీళ్ళే కాదు...
అతి నీల లోహిత కిరణాల ఆగడాలకు ఆనకట్టను...
అలవి కాని అనారోగ్యాలకు చెలియలి కట్టను .....
అసలు మనిషి ఉనికికే ఆధారమైన షష్టమ భూతాన్ని .... నేను
నగునూరి రాజన్న
కరీంనగర్ (ప్రస్తుతం USA )
No comments:
Post a Comment