గాలిపటం

అంశం - గాలిపటం

తేదీ 17-06-2019

శీర్షిక - ఎగరేసే వారి ఇగురం... 

సంఖ్య - 213 

పిల్లా పాపలకే కాదు పెద్దలకూ 

ఆట పాటలకు ఆహ్లాదాలనిస్తూ   

ఆనందాలు వెదజల్లే ఆకాశ పక్షిరాజు

అలనాటి మహానుభావుల ఆవిష్కారం ... 

  

భిన్నత్వపు రంగు పూల కాగితాలన్నీ కలిసి 

ఏకత్వపు అంశగా మన దేశపు రూపు రేఖల్లాగా   

లిఖిత రాజ్యాంగ సూత్రపు మాంజలతో 

చీడ పురుగుల భరతం పట్టగలిగే సత్తాతో 

అవసరాన మార్పు చేర్పుల వీలు కలిగిన  

అందమైన సంప్రదాయపు కుందనపు బొమ్మై 

విశ్వాంతరాలలో ఉన్నతంగా ఎదిగిన  

మన దేశ సంస్కృతికి చిరునామాగా నిలిచింది. 

పాలకుని పనితనం మీద 

ప్రభుత్వాల ఫలితాల చందంగా 

ఎగిరేసేవారి ఇగురం మీద ఎత్తు 

దూరం ఎంతుందో తెలుస్తుంది. 

పరిమిత ఎత్తులో మాత్రం  పడి లేస్తూ   

స్వల్పకాలిక సబ్సిడీలా  

దీర్ఘకాలిక అభివృద్ధా అన్న మీమాంసగా 

ఆపైన ఆకాశమే హద్దంటూ అనంత విశ్వంలో 

ఉన్నత శిఖరాలధిరోహణలో అభివృద్ధికి సంకేతంలా 

దిశా నిర్ధేశపు గమనాన మార్గదర్శకమై

మిల మిల మెరిసే నక్షత్రాలుగ అలరిస్థాయి ....    

నగునూరి రాజన్న 

కరీంనగర్ (ప్రస్తుతం: USA)