జానపద గేయం తేది: 17-07-2021

 జానపద గేయం

తేది: 17-07-2021
శీర్షిక : రాములోరి జాతర
కవిత సంఖ్య: 709

రాయే  రాయే  నా చిన్నాదానా
రాములోరి జాతరకు మనమెల్దామే

ఇగురంగ మెప్పించి
ఇంటికాడ జెప్పించి
ఇల్లందకుంట జాతరకు
మనమెల్దామే  మనమెల్దామే  ... //రాయే//

రాములోర్ని  దర్శించి 

దండిగ  మొక్కుకుందాం 

దారి చూపించమంటూ 

దయతోడ వేడుకుందాము .....   // రాయే //  

 

కళ్యాణం మనం జూసి

కనికరించుమందామె 

కారప్పూస తినిపించి 

కాఫీనీళ్ళు తాపిస్తా.... //రాయే//

రథం చుట్టు మనం తిరిగి
రాములోర్ని కోరుకుందాం

రబ్బరు గాజుల్ని వేయిస్తా 
రంగుల రిబ్బన్లు కొనియిస్తా....  //రాయే//

జాతరంత తిరుగుదాం 

జనశోభను చూద్దాము   

బత్తీసలు కొని ఇచ్చి 

బర్ఫీలను తినిపిస్తా ....   //రాయే//

రాట్నాన్ని ఎక్కుదాం
పట్నమంత చూడొచ్చు 
మళ్లొచ్చే జాతరకు
మనువాడి వద్దామే .... //రాయే//

నగునూరి రాజన్న
కరినగరము