పాపాల చిట్టా
తేది: 12-07-2021
శీర్షిక: కాలనాగు పుట్ట
కవిత సంఖ్య: 142
యథా రాజా తథా ప్రజ అన్నట్టు
మంచితనమెప్పుడు జలాధారలా
పైనుండి కిందకు ప్రవహిస్తేనే
సవ్యదిశగా సఫలీకృతమౌతుంది....
ఒకప్పుడు యుగము పేరులోనే
పొదువుకున్న సత్యం…కంటికి
నల్లపూసై మసి పూసి మారేడులను
చేస్తూ మాయలు సృష్టిస్తూ ఇంద్రజాలం
చేస్తూ హరివిల్లు భ్రమలను పంచుతున్నది....
యుగ ధర్మమో కాలమహిమములో
ధర్మం ఒంటికాలుపైన కుంటుతున్నది
ప్రతివాడు చిన్నదో పెద్దదో పొరపాట్లు
తప్పులు…చేస్తూనే కాలం వెళ్లదీస్తున్నారు....
కాలానుగుణంగా రాజ్యాలు మారినా
పాలనలు పతనమౌతూ నలుగురికి
పంచాల్సిన న్యాయం నవ్వుతున్నది
అర్థ బలం అంగబలం చేతిలో బందీ అయి ....
మత్త గజములలాంటి అధికార
మదపుటేనుగుల పాదాలకింద
నలిగిపోతూ మంచితనం నిత్యం రోదిస్తూ
సామాన్య మానవ గొంతుకై ఆక్రోశిస్తుంది….
పాపాల చిట్టా కాలనాగు పుట్టలా
పెరిగి మేరుపర్వతమై దాని నీడలో
మానవత్వం కనుమరుగై గుడ్డి కాలం
చెడ్డ రోజుల దివిటీలో ఒంటి కన్ను
రాక్షసుడై ఓండ్ర పెట్టి గాండ్రిస్తుంది....
నగునూరి రాజన్న
కరినగరము.
No comments:
Post a Comment