ఆషాఢం తేదీ : 14-07-2021

 ఆషాఢం

తేదీ : 14-07-2021
శీర్షిక: అంతా శ్రేష్ఠమే....
కవిత సంఖ్య : 144

గ్రీష్మ జ్వాలల సెగలకు ఆవిరైన
సంద్రపు నీరు అల్లన కదిలి చల్లని
గాలులకు కొండవాలులకు భువిపైన
చేరి చిరు జల్లులు కురిపించి భూదేవి
మేనును చల్లబరుచు కాలం .....

ఉత్తరాయణ పుణ్యకాలం ముగిసి పోయి
ఉత్తమ పురుషోత్తముడు పాలసంద్రంపై
యోగ  నిద్రకుపక్రమించ.... జోరుగా
వానలందుకుని పడువాట్లకు చెరువులు
కుంటలు నిండి మత్తళ్లు దూకే పుణ్యకాలం...

ఒడినిండిన అమ్మలా ... చెరువులన్నీ
అందమైన మీనములకు ...బెకబెకల
గోండ్రు కప్పలకు....జరాజరా పాకి జడుపు
పుట్టించే వాన పాములకు ... అపురూప
దర్శనాల  కూర్మములకు... జీవాధారమౌ
జలచరములన్నింటికి .....రైతన్నకు పండగే

అవని యాత్రలో దక్షిణాయనం ప్రారంభమై...
తొలి ఏకాదశి గురుపౌర్ణమి పర్వదినములు...
జగన్నాథ రథ యాత్రలతో ...అమ్మవారి బోనాలతో
శాకాంబరీ అలంకారాలతో ఆధ్యాత్మిక శోభలన్ని
కలగలిపి అల్లుకున్నదే ఆషాడ మాసం .....

సదా తొలివాయనం మహిళామణులకంటూ
ఎండలకని ఉపశమనాలో... కొత్తనీటి వల్ల
కలిగే కలుషితాలను కొంత మట్టుబెట్టనో ....
అలంకారాలతో గోరింటల పంటలతో
కళకళలాడు ఆడవారి చేతులు...

అన్ని శుభాలనే  సంకేతించినా ...
సంప్రదాయాల చిరునామాలో మాత్రం
కొత్త దంపతులకు కొంత విరహమే...
ఎడబాటుల వియోగాలతో .....

నగునూరి రాజన్న