అసలుకన్నా వడ్డీ ముద్దు తేది: 14-07-2021

 అసలుకన్నా వడ్డీ ముద్దు

తేది: 14-07-2021
శీర్షిక :  మానవ నైజం
కవిత సంఖ్య: 708

కష్టాల కొలిమిలో కాకలు తీరి
కన్న పిల్లలను కంటికి రెప్పలా
అల్లారు ముద్దు చేసి పెంచినా
తీరని ఆనందాల ఆమని ......

భారాలెన్నో మోసి మోసి
బాటసారులై పోతున్న తరుణాన
బోసినవ్వుల పౌత్రులను చూడంగానే
ఎక్కడ లేని జవసత్వాలే ...ఆనందాలే ...

వెండి తీగల జలతారు వయసులో
ముదిమి వయసు మీదపడినా
వెన్నెముకలు జారిపోయి వంగిపోయినా
చల్ చల్ గుర్రమై చలాకీలు ఆడుకుంటాయి ....

కంటి చూపులు కానరాక మందగించినా....
కర్ణ భేరీలు సన్నగిల్లి వినలేకపోయినా
ఒంట్లో శక్తి సత్తువలు సన్నగిల్లినా
చిన్ననాటి చిలిపి కథలన్నీ గుర్తు చేసుకుంటాయి ....

నాగరికతల నడకలలో మానవ
జీవితాలన్నీ మానవత్వాలను
మరిచి పోయి  ఆర్థికత్వాలను
మూటకట్టుకుని ఊరేగుతున్నాయి ....

పట్టి పట్టి బేరమాడే నిత్య
భుక్తం కూరగాయాలనుండి
పట్నపు కార్పొరేట్ మాల్స్ లలో
ఒకటి కొంటె రెండవది ఫ్రీ దాకా ...
మానవ నైజాలకు ప్రతిబింబాలే ....

నగునూరి రాజన్న
కరినగరము