ఉగాది గేయం తేది : 02-04-2022 శీర్షిక : శుభకృత్ పూదోట

 ఉగాది గేయం 

తేది : 02-04-2022

శీర్షిక : శుభకృత్ పూదోట

కవిత సంఖ్య: 882

స్వాగతాలు స్వాగతాలు

నవ వసంత మాలకు

మనసారా స్వాగతాలు

శుభకృత్ పూదోటకు 

కాలమే కామధేనువని 

అనుభవాల సారము 

కర్తవ్యాలే పూజనీయమని 

తెలిపెకదా పూజ్యులు….  //స్వా //

తెల తెలవారగనే  కళ్ళాపి

తెల్లపిండి రంగవల్లులతో

తెలుగువారి లోగిళ్లు

కళకళ  లాడుతుంటే ….  //స్వా //

అంచు చీరలాభరణాల

ఆంగనల కోలాహలం 

రకరకాల పిండివంటల 

రంజిల్లు గృహసీమలు ...  //స్వా //

ఋుతువు సంధి కాలాలను 

బతుకు తీర్చ ఒడిసిపట్టు

తీపి చేదు పులుపు వగరు 

ఉప్పు కారం  ఓషధులతో….  //స్వా //

నవ వసంతమై వచ్చింది

కొత్తచిగుళ్ళు తరువులకు

కొండంత పరవశాలు 

కలకూజిత రాగాలు…  //స్వా //

కోవెలలో  దర్శనాలు 

కోటి ఆశల పల్లవులు 

పంచాంగ శ్రవణములు

ప్రణాళికల పట్టములు…  //స్వా //

కాలగణన చైతన్యంగ

కదిలింది మానవాళి 

అనుభవాల సారాలను

ఆదరించి నిలిచింది…. //స్వా //

నగునూరి రాజన్న

కరినగరము.