శ్రీలంక నేటి పరిస్థితులు
తేది: 11-05-2022
శీర్షిక : ఇగురం తప్పిన ఇరకాటం
కవిత సంఖ్య : 901
ఇల్లైనా...దేశమైనా...నడపడంలో
ఇగురం తప్పితే ఇరకాటమే ...
ప్రకృతి ప్రదర్శించే పాఠాలను
పట్టించుకోకుండా ... స్వార్థాల
సంచులు తగిలించుకోవడమే ....
అనుభవాల వాస్తవాలను
అలుసుగా ఆవలకు నెట్టి ...
పట్టింపులేని పాలకులకులతో
కొట్టి పారేసే తత్వాలకు సూటి ప్రశ్న ....
పౌరులైనా ... పాలకులైనా
అందుబాటైన వనరులను
పొందుగా వాడని తత్వమే ...
విచ్చలవిడితనాల వింత పరాకాష్ట.
సమన్వయాలు కరువైన
సలక్షణం ...కుప్పెంతో ...అప్పెంతో....
పట్టుబడని అంతు చిక్కని
విదేశీవిధానాల ప్రధానాలు...
డాంబికాల దండోరాలతో
కుప్పమీద వచ్చిన తెప్పలాటలే ....
గమ్యం తెలియని గమనాలతో
విజన్ లేని వింత తత్వాలతో
పరాన్న జీవులుగా ప్రాణాలు
నిలుపుకుందామనుకునే వారికి
గుణపాఠం .....
ఉచిత తాయిలాలతో ...
ఊరేగిన భోగ లాలసతలు ....
ఉత్పాదకతలు కనుమరుగైన
ఊకదంపుడు ముచ్చట్ల ఫలితం...
అందరూ వంటల వల్లభులే ...
అందరూ బోధించే గురువులే ...
ఉప్పు కారాల కొరతల తిప్పళ్లతో
ఊరేగిన చిప్ప కూడు భోజనాలు ....
స్వయంకృషిని సదా సన్మానిస్తూ
పట్టుదలలే అసలైన పెట్టుబడులుగా
దృఢ సంకల్పాల గాఢతలను ప్రోత్సహిస్తూ
అనన్యమైన దేశభక్తి చాటిన ఎన్నో
దేశాలు...జీరోలనుకున్నవి ఈనాడు
హీరోలుగా ఎదిగారు .....
నగునూరి రాజన్న
No comments:
Post a Comment