తలగడ
తేది : 06-04-22
శీర్షిక : తగ్గేదేలే ....
కవిత సంఖ్య 885
పరిమాణం చిన్నదైనా
పనితనాల ఫరిఢవిల్లుతుంది
అలసటలు తీర్చే ఆరాటంలో
అలరారుతుంది అమోఘమై ....
కండరాల పొత్తిళ్లలోనుండి
కరుకు నేల మీద పడగానే
కాపు కాసి కౌగిలించుకుని
పహారా కంచెలా సైనికుడయ్యింది ...
పట్టు పరుపులైనా సరే
పట్టు తప్పం తన సాయముంటే ...
దళసరిదో సున్నితమో
దన్నుగా నిలబడుతుంది ....
సుఖనిద్రలకు సుగమమై
సుందరపాత్రను పోషిస్తుంది
దుఃఖాలకు... దాపుగా నిలిచి
మిత్రునివలె ఓదార్పులిస్తుంది .....
దూదితో ఆకారమేర్పరుచుకుని
రూపాలెన్నో మార్చి మార్చి
వింత వింత రూపాల వెలుగొంది
విపణిలో వినూతనమై విరాజిల్లుతుంది ....
ప్రకటనలకు పట్టుకొమ్మై నిలిచి
పటాటోపాలను వెలగబెడుతూ
పదుగురికి పనులెన్నో కల్పిస్తూనే
ప్రజలందిరిని ఆకట్టుకుంటుంది .....
తలగడే కానీ తగ్గేదేలే అంటూ
మనువున్నంత సేపు
మనిషిని అంటిపెట్టుకునే
పటుతరమైన సాధనం .....
ఆఖరి పయనంలో సైతం
అలవాటుగానో పొరపాటుగానో
తోడు నీడై వెంట నడిచి
తోబుట్టువులా నిలిచే సాధనం .....
నగునూరి రాజన్న
కరినగరము
No comments:
Post a Comment