ఆరాధన
తేది: 02-05-2022
శీర్షిక : పల్లె తల్లి ఒడి
కవిత సంఖ్య : 894
పల్లె తల్లి ఒడిలో ప్రభవించినందులకో ...
కల్మషాలెరుగని కరుణామూర్తుల
మధ్య పారాడినందులకో ....
పండు వెన్నెల్లాంటి ప్రకృతి సోయగాల
నడుమ పరవశిస్తూ పెరిగినందులకో ....
తొలకరి చినుకులకే మురిసిపోయి పచ్చ
తివాచీలు పరుచుకునే పల్లె తల్లి ఒడి ...
కాంక్రీటు కామందుల ఛాయలు పడని
చెట్ల నీడల మట్టిగోడల పెంకుటిండ్లన్నా .....
గలగల పారుతూ గమ్మత్తుగా
సాగే సెలయేళ్ళన్నా ....
అల్లన వీచే చల్లని గాలులకు
తలలూపుతూ తన్మయమొందె
పంట చేల ధాన్య శిరములన్నా ....
పక్కవారి కష్టాలకు గిలగిలలాడే
బంధుత్వాల వారధి పిలుపులన్నా .....
నమ్మకంలో ముందు వరస నిలిచి
మాటకు నడయాడే పశు సంపదలన్నా ....
పెద్ద పెద్ద సదువులెరగకపోయినా
సుద్దుబుద్దులెన్నో ముద్దుగ చెప్పే
అనుభవాల రజిత కిరీట సిరిసంపదల
అమాయక చక్రవర్తుల మాటల ముల్లెలకు ....
అంబా అనే మధురిమల ఆవుదూడలున్న
పశు ప్రాంగణాలు ... అవధిలేని
ఆనందాలను స్వంతపరిచే సరంగు...
పసిపాపల బోసినవ్వులాంటి పల్లె తల్లి ఒడి ....
సదా ఆరాధనీయమే ......
నగునూరి రాజన్న
No comments:
Post a Comment