తగిన మూల్యం (3)
దశ తిరుగుతుందని ఎదురు
దిశను మార్చుకున్నందుకు
ప్రవర్తనకు తగినట్టుగా పతనాలను
మూటకట్టుకుంటున్నందుకు ....
జ్ఞాన కుసుమం అనుకుని
నాయకత్వ బాధ్యతలు అప్పజెప్పితే
స్వార్థ సంచులు తగిలించుకుని
అజ్ఞానాలతో అంటకాగిస్తుంటే
తప్పదు ఎవరికైనా ....
పట్టుదలలకు పెట్టింది పేరై
దీక్షా దక్షతలతో గమనం సాగించి
ధృడ సంకల్పాలతో గమ్యం చేరుకోగలిగే
దుక్క ఇనుము లాంటి మనిషికి నిలువెల్లా
చిలుము ఆవరించక తప్పదు కదా ...
ఆరోగ్యవంతమైన మనిషిని
అనవసర వ్యసనాల ఊబిలో దించాక
మత్తులో జోగుతూ బాధ్యతలు మరిచినప్పుడు
మూల్యాలు చెల్లించుకోవాల్సిందే ....
పూల పొదరిల్లులా పరిమళించాల్సిన
మనిషి... స్వార్థ వాయువులను పీల్చాక
కలుషిత కాసారాలౌతున్న పంచభూతాలతో
కలికాలం మూల్యం చెల్లించుకోవాల్సిందే ....
న్యాయానికి ప్రతీకగా ... నిలవనంత కాలం ...
ప్రతి గమనానికి తగిన మూల్యం చెల్లించి
తీరవలసిందే ....
నగునూరి రాజన్న
No comments:
Post a Comment