కొత్త పొద్దు పొడుపు
తేది : 19/20-12-22
శీర్షిక : ఆశిద్దాం ...
కవిత సంఖ్య : 192+6
యుగాలనాటి మాట రామరాజ్యం
చిరాకు పరాకులో మాట్లాడిన
మడేలు మాటలకు సైతం
చివుక్కుమన్న చిత్రమైన మనస్తత్వం...
కలియుగమేమో... కలిమాయలేమో ...
స్వార్థచింతనలతో సదురుకునుడే ..
ఎదురుగ మాట్లాడితే ఏవగించుకోవడం ...
కుదురుగ అడిగితే వినిపించుకోక పోవడం ...
కార్యకర్తల పేర్లు చెప్పి కార్యాలు
చక్కబెట్టుకోవడంలో నాయకులు ....
ప్రజల సంక్షేమాల పేర్లు చెప్పి
పనులు చక్కబెట్టుకోవడంలో పాలకులు
ప్రభుత్వాలన్నీ పోటీ పడుతున్నాయి ....
ప్రజలంటే ప్రాణమెదురు పెట్టే
ప్రజా నాయకులకోసం పడిగాపులే ....
గుండెలెదురొడ్డిన ఓ శాస్త్రీనో ...
గురి కుదిరిన ఓ కలామునో ...
ప్రతిభకలిగిన పాలకుల జాడలు
సూక్ష్మదర్శినిలకు కూడా సుదూరమే ....
ఆవులు ఆవులు కొట్లాడుకుంటుంటే
లేగ దూడలు నలిగిపోయినట్టు
ఏమున్నది గర్వకారణం ...
నరజాతి చరిత్ర సమస్తం
పరపీడన పరాయణత్వం ....
రెక్కల కష్టం మీద బుక్కలేరుకుంటున్న
ఎదుగు బొదుగూ లేని సగటు మనిషికి
ఎప్పుడొచ్చునో... ఎలా వచ్చునో...
తమను ఉద్ధరించే కొత్త పొద్దు పొడుపు
ఆశ చావక ఆశతో బతకడమే .....
No comments:
Post a Comment