నగరంలో వాన

అంశం - నగరంలో వాన

తేదీ- 22-08-2019  

శీర్షిక -  ఏటిలో పిసికిన చింతపండు ....
సంఖ్య - 268

పారిశ్రామిక గాలి దుమారంలో 

పల్లెలన్నీ తూర్పారబట్టినట్టు

పట్టెడు మెతుకుల వేట కోసం

పట్టణాల జాడలు వెదుక్కున్నాయి ....  

చీమకున్నపాటి చింత చెందని 

రేపటి చూపులేని శ్రామికులంతా 

నిండా కాసిన అల్లనేరేడు చెట్లలా  

అల్లుకున్నారు పట్టణ మురికివాడల్లో ....  

నీరున్నసాగరాన ఏమీలేని ఎడారిలోన 

పాడి పంటలు లేని పట్టణాన... వాన  

ఏటిలోన పిసికిన చింతపండువలె  

ఎందుకూ కొరగాని చందమే చిత్రంగ 

కబ్జాకోరుల కబంద హస్తాల్లో చిక్కి శల్యమైన 

చెరువు కుంట వాగు వంక మురికి  కాలువలు 

అరవైలనాటి అడ్రస్ లేని డ్రైన్లతో 

అతలాకుతలమే అడ్డగోలు రోడ్లన్నీ.... 

ఉరుకుల పరుగుల జీవితాలకు 

క్యుములోనింబసులంటూ కుమ్మరిస్తే 

మన్ను తిన్న పామే అవుతుంది 

మన వాహనాల రద్దీ గంటలకొద్దీ.... 

మయుడు విస్తుబోయే మానవ మేధ ఉన్నా.... 

కదలని  మెదలని సృజనశీలురు 

కసాయి నిండిన మన పాలకులు 

కడుపున చల్ల కలిగిన అధికారులు ....