అంశం - నాగేటి చాళ్లు
తేదీ - 27-08-2019
శీర్షిక - మానవాళి భాగ్యరేఖలు
సంఖ్య - 272
తొలకరి పలకరింపులకు పులకరించి
పచ్చలు ధరించిన అవని ముఖమున
హాలికునిచే అలంకరింబడిన కుంకుమై
సింధూరత సంతరించుకున్న నాగేటి చాళ్లు.......
గుప్పెడు గింజలు తనలో చేర్చిన
రైతన్నకు సుందర నందనవనమై
బండెడు ధాన్యం బహూకరించే
మానవాళి కొరకు విరబూసిన భాగ్యరేఖలు....
అన్నదాతల కష్టసుఖాలను
ఆదరంగా పంచుకుంటూ
అన్ని వేళల కనిపెట్టుకునే అవని
అంతరంగపు ఆణిముత్యాలు....
అక్షర జ్ఞానం ఉన్నా లేకున్నా
అంతంత మాత్రమే అయినా
అన్నదాతల చేతిలో చూడ చక్కని కవాతు చేసే
జవాను పోలిన క్రమశిక్షణ సంకేతాలు ....
రైతు పరిపుష్టమైతేనే
రాజ్యం సుభిక్షమని తెల్సినా
కష్టాలని గుర్తించని రాజకీయుల నీడలో
రైతులకు భరోసా నింపే రాజమార్గాలు.....
నగునూరి రాజన్న
కరీంనగర్ (ప్రస్తుతం: USA)
No comments:
Post a Comment